Prezidentning “O‘zbekiston Respublikasi hududida sotiladigan mahsulotlarning Yagona elektron katalogini joriy etish chora-tadbirlari to‘g‘risida”gi qarori loyihasi e’lon qilindi.

Qayd etilishicha, O‘zbekiston Respublikasi Davlat soliq qo‘mitasi tomonidan tadbirkorlik sub’yektlari foydalanadigan mahsulotlar nomlarini unifikatsiyalash bo‘yicha ishlar olib borilgan.

O‘zbekiston Respublikasi Davlat soliq qo‘mitasining birlamchi hujjatlarda unifikatsiyalashgan mahsulot (tovarlar, xizmatlar) nomlaridan foydalanish, shu jumladan bosqichma-bosqich mahsulotlarning noyob kodlarini (shtrix-kodlarini) unifikatsiyalashgan mahsulot nomlariga avtomatik ravishda bog‘lash to‘g‘risidagi taklifiga rozilik bildiriladi.

Quyidagilar:

  • Tashqi iqtisodiy faoliyat tovar nomenklaturasi (2017 yil versiyasi) asosida ishlab chiqarilgan mahsulot, tovar va xizmatlar asosiy turlarining yagona elektron katalogi;
  • Mahsulotlar (tovarlar, xizmatlar)ning Yagona elektron katalogini yuritish tartibi to‘g‘risidagi nizom;
  • Xo‘jalik yurituvchi sub’yektlarning tuzilgan shartnomalarini Yagona shartnomalar axborot platformasida ro‘yxatdan o‘tkazish tartibi to‘g‘risidagi nizom tasdiqlanadi.

Belgilanishicha:

  • 2020 yil 1 noyabrdan boshlab - mahsulot, tovar va xizmatlar asosiy turlarining yagona elektron katalogida ko‘rsatilgan mahsulot noyob nomlari va identifikatsiya kodlarini elektron hisobvaraq-fakturalarda aks ettirish;
  • 2021 yil 1 yanvardan boshlab – tadbirkorlik sub’yektlari o‘rtasida tuzilgan shartnomalarni, Yagona elektron shartnomalar informatsion portalida ro‘yxatdan o‘tkazish;
  • 2021-yil 1 fevraldan – elektron hisobvaraq-fakturalarida mahsulotlarning unifikatsiyalashgan nomlari va Yagona elektron shartnomalar informatsion portalida ro‘yxatga olingan shartnomalari asosida ularning mahsulotlar va xizmatlar uchun identifikatsiya kodlarining (MXIK) avtomatlashtirilgan tarzda aks etilishi joriy qilinadi.

O‘zbekiston Respublikasi Davlat soliq qo‘mitasi huzuridagi «Yangi texnologiyalar» ilmiy axborot markazi davlat unitar korxonasi Katalog va Yagona elektron shartnomalar informatsion portalini yurituvchi operator deb belgilanadi.

O‘zbekiston Respublikasi Davlat soliq qo‘mitasiga tadbirkorlik sub’yektlari takliflari hamda bozorda yangi mahsulot turlari shakllanishi asosida Katalogga o‘zgartirish va qo‘shimchalar kiritish vakolati beriladi.