INVENTO ustoz va murabbiylar kuni bilan muborakbod etadi

INVENTO The Uzbek International School barcha ustoz va murabbiylarni kasbiy bayrami bilan tabriklaydi hamda yosh avlodni tarbiyalashga qo‘shib kelayotgan ulkan hissasi uchun minnatdorlik bildiradi.

Eng qadim zamonlardanoq ta'lim ulashish jamiyatdagi eng obro‘li hamda hurmatli kasblar orasida bo‘lib kelgan. Xalqimiz orasida “ustoz otangdek ulug‘” maqoli ham bejizga aytilmagan. Chunki ustozlar bolalarga bilim berish bilan birga, ularni katta hayotga tayyorlaydilar hamda bolalarning ona yurtga bo‘lgan muhabbat va vatanparvarlik tuyg‘ulari bilan ulg‘ayishi uchun tinimsiz mehnat qiladilar.

Mazkur ulug‘vor kasb egalari oldida bolalarga sifatli ta'lim berib, mamlakatimizning rivojlanishiga o‘z hissasini qo‘shishga qodir barkamol avlodni tarbiyalash kabi muhim vazifa turibdi.

So‘nggi yillar ichida yurtimizda ta'lim tizimini tubdan isloh qilish bo‘yicha ulkan ishlar amalga oshirilmoqda. Ushbu sohadagi davlatimizda bajarilayotgan ahamiyatli vazifalar orasida yuqori malakali mutaxassislarni yetishtirish hamda ustoz va murabbiylar mehnat faoliyati uchun munosib sharoit yaratish bo‘lib kelmoqda.

Ushbu bayram munosabati bilan INVENTO The Uzbek International School barcha O‘zbekiston ustoz va murabbiylarini kasb bayramlari bilan chin dildan muborakbod etadi. INVENTO jamoasi o‘quvchilariga mehr va tarbiya berib kelayotgan barcha o‘qituvchilarga minnatdorchilik bildiradi hamda ularga sog‘lik-salomatlik, ulkan baxt, faxrli kasb yo‘llarida yanada ko‘proq yutuqlar va kelajak avlodni tarbiyalash vazifasida yuksak natijalarga erishishlarini tilab qoladi.