Umumiy o‘rta ta'lim maktablari o‘quvchilari uchun sun'iy qoplamali stadion qurilib, foydalanishga topshirildi

O‘zbekiston Respublikasi Prezidentining 2017 yil 3 iyundagi “Jismoniy tarbiya va ommaviy sportni yanada rivojlantirish chora-tadbirlari to‘g‘risida”gi PQ-3031-sonli qarori hamda prezidentimiz rahbarligida 2019 yil 19 martda “Yoshlar bilan ishlashni samarali tashkil etishda madaniyat, san'at, sport, axborot texnologiyalari, kitob o‘qishga qiziqishni oshirish bo‘yicha 5 ta muhim tashabbusni amalga oshirish to‘g‘risida” o‘tkazilgan videoselektor majlisi bayonida belgilangan vazifalar ijrosini ta'minlash maqsadida Xalq ta'limi vazirligi tizimidagi umumiy o‘rta ta'lim maktablari o‘quvchilari o‘rtasida jismoniy tarbiya va ommaviy sportni yanada rivojlantirish, ayniqsa, chekka hududdagi o‘quvchi-yoshlarni sportga keng jalb etish, ularning bo‘sh vaqtlarini mazmunli o‘tkazish, jismoniy tarbiya va sport bilan shug‘ullantirish samaradorligini oshirish borasida O‘zbekiston “Yoshlik” jismoniy tarbiya va sport jamiyati Markaziy kengashi tomonidan ko‘plab ijobiy ishlar amalga oshirib kelinmoqda.

Jumladan, Markaziy kengashning budjetdan tashqari mablag‘lari hisobidan Xatirchi tumanidagi 18-umumta'lim maktabiga sun'iy qoplamali futbol maydoni qurilib, joriy yilning 7 noyabr kuni foydalanishga topshirildi.

Ushbu stadionning ochilish marosimida Xatirchi tumani hokimi o‘rinbosari O.Nishonov, O‘zbekiston “Yoshlik” jismoniy tarbiya va sport jamiyati Markaziy kengashi raisining birinchi o‘rinbosari T.Toyirov, sport faxriylari hamda taniqli sportchilar ishtirok etdi.

Shundan so‘ng sportning futbol turi bo‘yicha o‘quvchilar va pedagog xodimlar o‘rtasida sport musobaqasi bo‘lib o‘tdi. Mazkur musobaqaning g‘olib va sovrindorlari Markaziy kengash tomonidan qimmatbaho esdalik sovg‘alari bilan taqdirlandi.

O‘zbekiston “Yoshlik” jismoniy tarbiya va sport jamiyati matbuot xizmati