AQShdagi saylovlar: Jorjiyada ovozlar qayta hisoblab chiqiladi

AQSh prezidenti saylovlarida muhim shtatlardan biri hisoblangan Jorjiyada 3 noyabrda o‘tgan saylovlarda berilgan 5 mln ovoz to‘liq qayta hisoblab chiqiladigan bo‘ldi. Bu haqda CNBC telekanali shtat davlat kotibi Bred Raffenspergerga tayanib xabar berdi.        

Raffenspergerning ta'kidlashicha, ushbu qaror nomzodlar Jo Bayden va Donald Tramp uchun berilgan ovozlar o‘rtasidagi farq kichikligi sababli qabul qilindi.

“Farq kichik bo‘lgani sababli, har bir okrugda byulletenlar boshqatdan qo‘lda hisoblab chiqiladi va oxir-oqibat biz yakuniy farq qancha bo‘lgani haqidagi savolga aniq javob beramiz”, deb aytgan Raffensperger.

Ta'kidlanishicha, saylovlarda g‘alaba qozongani e'lon qilingan Bayden va amaldagi prezident Tramp o‘rtasidagi farq Jorjiyada Bayden foydasiga 15 mingdan kamroq ovozni tashkil qilmoqda. Ushbu shtatdagi g‘alaba nomzodga 16ta ovoz beradi. Biroq Jorjiyadagi g‘alaba Trampga prezident bo‘lishi uchun baribir kamlik qiladi.    

Raffenspergerning qo‘shimcha qilishicha, ovozlar qayta hisoblanishi 20 noyabrgacha davom etadi. 

Fox News telekanali ma'lumotlariga ko‘ra, Jorjiyada 99 foiz byulletenlar qayta ishlangandan keyin Bayden Trampdan kichik farq bilan oldinda bormoqda: Baydenda 49,5 foiz (2,471 mln), Trampda esa 49,2 foiz (2,457 mln) ovoz bor.