Prezident Shavkat Mirziyoyev 23 noyabr kuni Toshkent shahrida yo‘l-transport infratuzilmasini rivojlantirishga oid konsepsiya taqdimoti bilan tanishdi.
«Toshkentda aholi ham, transport vositalari ham ko‘payib bormoqda. Oxirgi 10 yilda shaharda avtomobillar soni 250 mingtadan 510 mingtaga, ya’ni 2 baravar oshgan. Shunga mos ravishda transport infratuzilmasi ham rivojlantirilmoqda. Yangi yo‘llar, ko‘priklar, yerusti metrosi qurilmoqda.
Xususan, joriy yilda Toshkent metropolitenining «Yunusobod» yo‘nalishida 2 ta stansiya hamda yerusti halqa yo‘lining birinchi bosqichi ishga tushirildi. Jamoat transportida 56 ta yo‘nalish maqbullashtirildi. Bular natijasida 170 ming aholining transport xizmati yaxshilandi, ularning transportga ketadigan vaqti o‘rtacha 15-20 minutga qisqardi.
Lekin poytaxtimiz ko‘chalarida yuklama ko‘p, yo‘l harakatini tartibga solishda kamchiliklar yetarli. Transport vositalari tirbandligi yildan yilga ortib borayotir», – deyiladi prezident matbuot xizmati xabarida.
Qayd etilishicha, davlat rahbarining poytaxtda jamoat transporti tizimi va infratuzilmasini takomillashtirish bo‘yicha bergan topshirig‘i asosida, shahar ko‘chalaridagi muammolar kompleks o‘rganib chiqilgan. Geoinformatsion tizim orqali transport va yo‘lovchilar oqimi tadqiq qilingan.
23 noyabrdagi taqdimotda ana shu tahlillar natijalari haqida prezidentga axborot berilgan.
«Toshkent shahrida 500 dan ziyod katta chorrahalar mavjud bo‘lib, ularning 200 tasida transport vositalarini tezkor o‘tkazish darajasi past. Avtomobil to‘xtash joylari yetishmasligi sababli yo‘lning birinchi qatorida mashinalar yig‘ilib, qatnovga xalaqit bermoqda. Haydovchilar uchun ma’lumot belgilari ham yetishmaydi. Piyodalar va velosipedlar harakati uchun qulaylik kam.
Shu kabi kompleks tahlillar asosida Toshkent shahrida yo‘l infratuzilmasi va jamoat transporti tizimini takomillashtirish bo‘yicha bosh rejaning dastlabki loyihasi ishlab chiqildi.
Xususan, poytaxtdagi 24 ta yirik chorrahaning harakatlanish tartibini optimallashtirish, bu orqali o‘rtacha to‘xtashlar sonini 71 foiz va vaqtini 48 foiz, tirbandlikni 64 foiz, yoqilg‘i sarfini 34 foizga kamaytirish mumkinligi hisob-kitob qilingan», – deyiladi rasmiy relizda.
