Farg‘onadagi «Neftchi» - «Turon» (0:1) uchrashuvidan keyingi voqealar haftaning eng shov-shuvli voqealaridan biriga aylandi. «Istiqlol» stadionidagi tartibsizliklarni tomosha qilgan har qanday inson bunday zo‘ravonlikni qoralaydi. Uchrashuvdan keyin «Turon» Superligaga yo‘llanma olgan bo‘lsa, «Neftchi» jiddiy jazoga tortilishi kutilmoqda. Tribuna.uz muxbiri Farg‘onadan qaytishda shu kungi voqealarni bevosita stadiondan kuzatgan PFL direktori vazifasini bajaruvchi Diyor Imomxo‘jayev bilan suhbatlashdi.
«Farg‘onadagi o‘yin 20-30 yil davomida hech kimning esidan chiqmaydi»
— Uchrashuvni o‘zingiz ham stadiondan turib ko‘rdingiz, jonli bahs bo‘ldi. O‘yindan ko‘nglimiz to‘ldi. Chunki biz ikki yildan buyon Pro liga ishtirokchilari sonini kamaytirib bo‘lsa-da, intrigani oshirish harakatida bo‘ldik. Mavsum davomida esa Pro liga saviyasini ko‘tara olganimizga guvoh bo‘ldik. Avvalgi yillarda quyi ligada qaysi jamoalar, qanday holatda turnirni yutib chiqqani ko‘pchilikning esida qolmagan. Farg‘onadagi bahs esa kamida 20-30 yil davomida hech kimning esidan chiqmaydigan o‘yin bo‘ldi.
Masalaning yomon tomonini hamma ko‘rib bo‘ldi, lekin yaxshi tomonini ham esimizdan chiqarmaslik kerak. Birinchidan, Pro liga obro‘si oshdi. Bu turnirni ham «Uzreport» telekanalida jonli efirga olib chiqqanimiz, Farg‘onadagi uchrashuvning final bahsidek o‘tgani, qolaversa «Dinamo» va «Sho‘rtan» o‘rtasidagi kurash so‘nggi o‘yinni derbiga xos o‘tishiga xizmat qildi. O‘yinni boshida futbolchilarning maydondagi o‘zaro keskinligi ham xursand qildiki, zerikarli futbol bo‘lmadi. Chunki o‘yindan oldin «Turon» o‘yinni «berishi», «Neftchi» chiqishi aniq» qabilidagi gaplar shunchaki mish-mish ekani oydinlashdi. O‘yinda ikki jamoa ham faqat g‘alabani o‘yladi. 90 daqiqa uchun ikki jamoaga ham rahmat deyman.
«Neftchi»da hali pley-off o‘yinida imkoniyat bor edi...»
— O‘yin oxirida esa «Neftchi» futbolchilariga professionallik yetishmadi. Chunki sodir bo‘lgan voqeani birinchi bo‘lib muxlislar boshlagani yo‘q. Bu holda muxlislarni to‘g‘ri tushunaman. Agarda mezbon jamoa futbolchilarida professionallik bo‘lganida, ular o‘yindan keyin muxlislarga qarsak chalishardi. Chunki «Neftchi»da hali pley-off o‘yinida imkoniyat bor edi. Mag‘lubiyatni tan olib, muxlislarni tinchlantirib, raqibni hurmat qilganida tomoshabinlar hech qachon bunday ishlar qilishmasdi. Futbolchilar esa aksincha hakamni oldida bu ishni qilganlaridan keyin muxlislar ham ko‘tarildi.
