09:03 / 18.12.2020
1630
АҚШда фармкомпаниялар вакцинанинг иккиламчи таъсирлари учун жавобгарликдан озод қилинди

АҚШ ҳукумати коронавирусга қарши вакцина ишлаб чиққан компанияларга, жумладан Pfizer ва Moderna’га уларнинг вакциналарини синаган кўнгиллиларда жиддий иккиламчи таъсирлар пайдо бўлса, жавобгарликдан иммунитет берди. Бу ҳақда экспертларга таяниб CNBC телеканали хабар берди.       

Таъкидланишича, америкаликлар бундай ҳолатларда АҚШнинг Озиқ-овқат маҳсулотлари ва дори воситалари сифатини санитар назорат қилиш бошқармасига ҳамда меҳнат фаолиятини амалга ошириш учун улардан эмланишни талаб қилган иш берувчилар устидан судга шикоят қилиша олмайди. 

АҚШ конгресси эмлаш оқибатида соғлиққа етказилган зарар билан боғлиқ харажатларни қоплаш учун махсус жамғарма ташкил этган бўлса-да, ундаги пуллардан фойдаланиш жуда қийин.

“Ҳукумат одамлар вакцина ишлаб чиқаётган компаниялар устидан судга шикоят қилишларини истамайди, чунки бундай ҳолатда ушбу компаниялар ўз вакцинаси учун ҳукуматдан кўпроқ пул сўраши мумкин”, деб изоҳ берган меҳнат ва бандлик бўйича адвокат Рогге Данн.

Февралда АҚШнинг соғлиқни сақлаш ва ижтимоий хизматлар вазири Алекс Азар 2005 йилги қонунга ишора қилиб, вазирлик муҳим тиббий товарлар, жумладан вакцина ва дорилар ишлаб чиқарувчи ёки тарқатувчи компанияларнинг ҳуқуқий ҳимоясини таъминлаши кераклигини айтган. Бу эса кейинги 4 йил давомида фармкомпаниялар эмлаш билан боғлиқ етказилган зарар учун суд жавобгарлигига тортила олмасликларини англатади.  

Pfizer ва Moderna компаниялари ҳамда соғлиқни сақлаш вазирлиги ушбу масалага изоҳ бермаган. 

Аввалроқ Pfizer вакцинаси америкалик шифокорда аллергия қўзғатгани маълум қилинганди. Шундан кейин вакцинани олган яна бир шифокорда аллергик таъсир кузатилган.  

Уларда ўтган ҳафта Британияда эмланган тиббий ходимлардаги каби реакция кузатилган. Шундан кейин аллергияга мойил бўлганларга Pfizer вакцинаси билан эмланмаслик тавсия қилинган.

Top