Moskva shahrida joriy yilning 25 dekabr kuni «O‘zmilliybank» AJ delegatsiyasining «VEB.RF» Davlat taraqqiyot korporatsiyasi va «Roseksimbank» AJ rahbariyati bilan amaliy uchrashuvi bo‘lib o‘tdi.
Unda ikki tomonlama banklararo hamkorlik va ShHT Banklararo birlashmasi doirasidagi joriy yildagi hamkorlik yakunlari sarhisob qilindi, yangi 2021 yildagi istiqbolli loyihalarni moliyalashtirish rejalari va imkoniyatlar muhokama qilindi.
«VEB.RF» Rossiya Sanoat va savdo vazirligining dasturi doirasida imtiyozli subsidiyalangan moliyalashtirishni ta'minlab, Rossiyaning yuqori texnologiyali uskunalarini mamlakatimizga yetkazib berishni moliyalashtirish bilan bog‘liq qator investitsiya loyihalarni amalga oshirish doirasida «O‘zmilliybank» AJning strategik sherigi hisoblanadi. Bankning O‘zbekiston va Rossiya o‘rtasidagi savdo-iqtisodiy aloqalarni rivojlantirishdagi faol ishtiroki o‘zining ijobiy natijalarini bermoqda.
«VEB.RF» Davlat taraqqiyot korporatsiyasi va «Roseksimbank» AJ rahbariyati bilan subsidiyali imtiyozli foiz stavkasini hisobga olgan holda, qiymati 4,8 milliard rublga teng kredit liniyasini ochish to‘g‘risida imzolangan kelishuvlar ushbu uchrashuv natijasi bo‘ldi.
Jalb qilinadigan mablag‘lar doirasida Transport vazirligi huzuridagi Avtomobil yo‘llari qo‘mitasi, Toshkent shahar va respublikamizning 12 ta shaharlari hokimligi ehtiyojlari uchun 581 dona zamonaviy maxsus yo‘l texnikasini xarid qilish bo‘yicha loyihani amalga oshirish ko‘zda tutilgan.
Hozirgi kunda O‘zbekistonda shaharsozlik, transport infratuzilmasini rivojlantirish, shahar kommunikatsiyalari sifati va yo‘l tizimining tegishli holatini yaxshilash masalalariga alohida e'tibor qaratilmoqda. Yo‘l maxsus texnikasini yangilash orqali ushbu kredit liniyasini samarali o‘zlashtirish respublikamiz poytaxti va uning markaziy hududlarini obodonlashtirish tadbirlarini amalga oshirish imkonini beradi.
Shu bilan birga, «O‘zmilliybank» AJ va «Roseksimbank» AJ o‘rtasida ilk marotaba shartnoma imzolanishi, asosiy vazifasi Rossiya Federatsiyasidagi korxonalarning eksport operatsiyalariga ko‘maklashish bo‘lgan mazkur davlat instituti bilan hamkorlikni faollashtirishning muhim bosqichi bo‘ldi.
«O‘zmilliybank» AJning «VEB.RF» Davlat taraqqiyot korporatsiyasi va «Roseksimbank» AJ bilan samarali hamkorligi respublikamiz bank tizimining yangi kredit liniyalarini rivojlantirish va sifatli xizmatlar ko‘rsatish imkoniyatlarini kengaytirish bo‘yicha olib borilgan kursning samarali davomidir.
