Turkiyada cheklovlar yumshatilishi boshlandi 

Turkiya prezidenti Rajab Toyyib Erdo‘g‘an 1 mart kuni koronavirus sababli 3 oydan ko‘proq vaqt oldin kiritilgan cheklovlardan keyin odatiy hayotga qaytish jarayoni boshlanganini e'lon qildi.   

Turkiya yetakchisining aytishicha, mamlakatdagi barcha viloyatlar 4ta toifaga bo‘linadi va ularga turli ranglar beriladi: ko‘k, sariq, zarg‘aldoq va qizil. Ranglar hududda koronavirus bilan bog‘liq vaziyatdan darak beradi. Erdo‘g‘an namoyish qilgan xaritaga ko‘ra, Turkiyadagi asosiy turistik yo‘nalishlar, jumladan Antaliya, Istanbul, Izmir va Mugluga zarg‘aldoq rang berilgan, bu esa ushbu shaharlarda koronavirus tarqalishi xavfi yuqori ekanini anglatadi. Bir qator markaziy viloyatlar, jumladan Anqara o‘rta xavfga ega hudud deb topilgan. 

 “1 mart kunidan odatiy hayotga qaytish bo‘yicha nazorat qilinuvchi jarayon boshlanmoqda. Past va o‘rta xavfga ega viloyatlarda dam olish kunlari komendantlik soati to‘liq bekor qilinadi, yuqori va o‘ta yuqori xavfga ega hududlarda esa faqat yakshanba kuni uydan chiqishga cheklov amal qiladi. Ish kunlari soat 21dan soat 5gacha amal qiluvchi komendantlik soati o‘z kuchida qoladi”, deb aytgan Erdo‘g‘an. 

Bundan tashqari, kafe va restoranlar yana mijozlarni qabul qilishi mumkin. “Restoran va kafelar 50 foizga to‘lgan holda soat 7dan soat 19gacha mijozlarni qabul qilishi mumkin”, deb qo‘shimcha qilgan Erdo‘g‘an. Biroq bu yumshatishlar infeksiya tarqalishi xavfi o‘ta yuqori bo‘lgan hududlarda amal qilmaydi.

Shu bilan birga, biror hududda vaziyat yomonlashgudek bo‘lsa, mahalliy ma'muriyat bunga mos ravishda tegishli choralarni ko‘rishi mumkin.

Ayni vaqtda Turkiyada koronavirusga chalinganlar soni 2,7 mlndan oshib ketdi, 28 mingdan ko‘proq kishi virusdan vafot etgan.