Qashqadaryoda ikki kishini 1 500 dollar evaziga ishga kiritmoqchi bo‘lgan firibgar qo‘lga olindi

Qashqadaryo viloyati Kitob tumanida ikki nafar shaxsni 1 500 AQSh dollari evaziga ishga kiritmoqchi bo‘lgan firibgar qo‘lga olingan. Bu haqda viloyat IIB ma'lum qilmoqda.

Qayd etilishicha, Kitob tumani Beshterak qishlog‘ida yashovchi S.G. 2021 yil 5 mart kuni ichki ishlar idoralariga ariza bilan murojaat qilib, shu tumanning Qo‘shchinor qishlog‘ida yashovchi S.Z. 2020 yil 7 iyul kuni «Sizni Milliy gvardiyaga ishga joylashtirib qo‘yaman», — deb 500 dollar olganini ma'lum qilgan.

Bundan tashqari, S.Z. Kitob tumani Panji qishlog‘ida yashovchi U.M.ga «Sizni Inter Injiniring qo‘shma korxonasiga ishga joylashtirib qo‘yaman», — deb, undan 1000 AQSh dollari va 100 ming so‘m miqdoridagi pullarini olgan.

Ta'kidlanishicha, S.Z. har ikki holatda ham o‘zganing mulkini firibgarlik yo‘li bilan qo‘lga kiritish maqsadida fuqarolarni aldagan va yuqoridagi insonlarning ishonchiga kirib, ulardan olgan pullarni o‘zining shaxsiy ehtiyojlariga ishlatib yuborgan.

Ma'lum bo‘lishicha, mazkur holatlar yuzasidan Kitob tuman IIB tergov bo‘linmasi tomonidan S.Z.ga nisbatan Jinoyat kodeksining 168-moddasi 3-qismi «b» bandi bilan jinoyat ishi qo‘zg‘atilgan.