Samarqanddagi barcha kasb-hunar maktablari, kollejlar va texnikumlar karantinga yopiladi

Samarqand shahridagi kasb-hunar maktabi, kollejlar hamda texnikumlar 2021 yil 27 apreldan karantinga yopiladi va darslar masofaviy ta'limga o‘tkaziladi. Bu haqda viloyat kasbiy ta'limni rivojlantirish va muvofiqlashtirish boshqarmasi axborot xizmati xabar bermoqda.

Ma'lum qilinishicha, Samarqand shahridagi kollej va texnikumlarda ta'lim olayotgan o‘quvchi-yoshlarda koronavirus infeksiyasini yuqtirib olish holatlari kuzatilmoqda.

Shu bois, shahar hokimligi huzuridagi epidemiyaga qarshi kurash favqulodda komissiyasining qarori tasdiqlangan. Unga ko‘ra, Samarqand shahridagi barcha kasb-hunar maktabi hamda kollej va texnikumlarda 14 kunlik karantin joriy etiladi va 27 apreldan boshlab onlayn ta'lim berish tizimi yo‘lga qo‘yiladi.

Qayd etilishicha, kasb-hunar maktabi hamda kollej va texnikumlarga kirib-chiquvchilar orasida karantin davrida koronavirus yuqtirib olish holatlari kuzatilmasa ta'lim berish tizimi an'anaviy yo‘lga qo‘yiladi.