Otabek Sattoriyning advokati: «Nazarimda, qoralash hukmi chiqib, qamaladigan bo‘lib turibdi»

Jinoyat ishlari bo‘yicha Muzrabod tuman sudida bloger Otabek Sattoriyning navbatdagi sud majlisi bo‘lib o‘tdi. Unda Otabek Sattoriyning advokati Xursanoy Kuchayeva ishni noxolis ko‘rilayotgani, Jinoyat-protsessual kodeksi talablari qo‘pol ravishda buzilayotgani uchun sudyani rad etish, jinoyat ishini Jinoyat ishlari bo‘yicha Surxondaryo viloyat sudiga yuborish bo‘yicha sudga iltimosnoma kiritdi.

Jabrlanuvchining advokati sudni noxolislikda aybladi, deb hisoblab Xursanoy Kuchayevani jazolashni ko‘rib chiqish uchun Sudyalar oliy kengashiga hujjat yo‘llash lozimligini bildirdi.

Ishda ishtirok etuvchi prokuror Otabek Sattoriyning advokatiga sud, tergov va prokuraturadan asossiz norozi bo‘layotganini bildirdi. Prokuror sud shaffof o‘tkazilayotgani, jurnalist va blogerlarning sudda ishtirok etishiga imkoniyat yaratilganini, Otabek Sattoriyni aybsizligini isbotlovchi dalillari bo‘lsa sudga taqdim etishini aytib advokatlarning so‘zlari noto‘g‘ri talqin etilishi mumkinligini bildirdi.

Sud Otabek Sattoriyning advokatni iltimosnomasini maslahat uyida ko‘rib chiqib, rad qilish bo‘yicha ajrim chiqardi.

Sud jarayonida yozma dalillar namoyish etildi. Yozma dalillar muhokama qilindi. Prokuror yozma dalillarni jinoyat ishiga qo‘shish lozimligini bildirdi.

Sattoriyning advokati ushbu dalillarning birortasi ayblovga aloqasi yo‘qligi uchun ayblovga qo‘shmaslikni so‘radi. Jabrlanuvchining advokatlari dalillarni ayblov xulosasiga qo‘shishni so‘radi. Sud yozma dalillarni jinoyat ishiga qo‘shib baholanishi bo‘yicha ajrim chiqardi.

Sud raisi sud tergovini tamomlash bo‘yicha taraflardan ish bo‘yicha qo‘shimcha fikr so‘radi. 

Sud 4 may kuniga qadar tanaffus e'lon qildi.