Loyihaga muvofiq, fuqarolik, ma’muriy va iqtisodiy ishlar bo‘yicha advokatlar hamda sudlar, huquqni muhofaza qiluvchi organlar va boshqa davlat idoralari o‘rtasida elektron hujjatlar almashinuvi darajasini kamida 50 foizga yetkazish ko‘zda tutilgan. Shuningdek, advokatlar sonini kamida 2000 nafarga ko‘paytirish rejalashtirilmoqda.
Korrupsiyaga qarshi kurash yo‘nalishida esa Transparency International tashkiloti e’lon qiladigan Korrupsiyani qabul qilish indeksida kamida 20 pog‘onaga ko‘tarilish maqsad qilingan. Davlat xaridlarida ma’lumotlarni mashinada o‘qiy oladigan formatda, xususan, Open Contracting Data Standard (OCDS) formatida joylashtirish ulushini 100 foizga yetkazish ham belgilangan.
Bundan tashqari, raqobatlashmagan usullarda amalga oshirilgan davlat xaridlari ulushi 20 foizdan oshmasligi ta’minlanishi (favqulodda holat va yagona yetkazib beruvchi bilan amalga oshirilgan xaridlar bundan mustasno), shuningdek, normativ-huquqiy hujjatlarning 100 foizi “korrupsiyadan xoli qonunchilik” tamoyili asosida ishlab chiqilishi nazarda tutilmoqda.
