Biznes-murabbiy Muhammad Ali Eshonqulov MFaktor loyihasidagi suhbatda niyat, rizq va tadbirkorlik haqidagi fikrlari bilan o‘rtoqlashdi.
«Odam o‘z niyatiga yarasha oladi. Xudodan rizqimni halolidan bergin va oson qilib bergin, deb so‘rash kerak ekan. Odam o‘zidan norozi bo‘lishi kerak, lekin ko‘pchilik teskarisi: o‘zini mukammal odam deb hisoblab, xudo bergan taqsimotga norozi bo‘lib yuraveradi. Bu – noshukrlik. Noshukrlik doim hasratni keltirib chiqaradi.
Kim o‘zida bor narsalarga shukr qilsa, Alloh taolo uni unda yo‘q narsalar bilan rizqlantiradi-da. Bir inson qiynalib, kun issiqligidan terlab tepaga yuk tortib chiqayotgan ekan. To‘xtab, xudoga nolibdi: «Ey xudo, men shu bir burda nonni topaman deb jonimni shuncha qiynashim shartmi? Rizqimning kafilligini olgan bo‘lsang, men yotsam-u rizqim o‘zi kelaversa bo‘lmasmidi?»
Sal nariroqda ikki odam urishayotgan ekan. U ularni ajrataman deb kelsa, shu payt mirshablar kelib, uchalasi jamoatchilik tinchini buzyapti deb olib borib qamab qo‘yibdi. Zindonda, sovuqda yotsa, eshik taqillabdi. Qarasa, non bilan suv olib kelishgan ekan. Keyin tavba qilgan ekan: «Ey xudo, bu yerda rizqimni yeb yotgandan ko‘ra, ozodlikda tinchgina mehnat qilganim yaxshi edi».
Eng muhimi, niyatni to‘g‘ri qilish. Rejalashtirishda xato qilish – xato qilishni rejalashtirish deyishadi. Shuning uchun insonlar hayotini reja qilayotganda, niyat qilib so‘rayotganda o‘ziga o‘zi chegara qo‘ymasligi kerak.
Bir bahodir cho‘l-u dashtda suvsizlikdan qiynalib, adashib qolibdi. Yurib-yurib, holdan toyay degan payti hovuzni ko‘rib qolibdi. Tip-tiniq, zo‘r hovuz ekan. Kuchini bir joyga yig‘ib, u yerga yetib borib, endi hovuzdagi suvdan ichaman desa, yonida uch boshli ajdar uxlab yotibdi ekan. Qilichini chiqarib, olishib ketibdi. Ancha payt jang qilib, bitta kallasini olibdi. Yana ancha vaqt kurashib, ikkinchi kallasini olibdi. Keyin ikkalasi ham charchab, bir-biriga suyanib qolibdi. Shunda ajdar so‘rabdi: «O‘zi nimaga kelganding?» Bahodir aytibdi: «Suv ichmoqchi edim». Ajdar aytgan ekan: «Ichaversang bo‘lmasmidi, men senga biror narsa dedimmi?»
Ya'ni o‘zimiz yo‘q joydan uch boshli ajdarlar yaratib olmasligimiz kerak. Muammoga o‘zingizni borib urmasangiz, tegmasangiz, muammo sizga tegmaydi. Ong ostida bor narsa: odam kasallikni o‘zi chaqiradi.
Shuning uchun eng avvalo niyatimizni poklab, to‘g‘rilab olishimiz kerak. Masalan, «Shu biznesni boshlayapman, boshida katta qiyinchilik bo‘ladi, 3-6 oylab katta minusga kiramiz, lekin bardam bo‘lishimiz kerak, 6 oydan keyin zo‘r bo‘lib ketadi» desa, u 6 oy aniq foydaga kirmaydi.
