Bu haqda Germaniyaning axborot texnologiyalari, telekommunikatsiyalar va kompyuter texnologiyalari sohasidagi Bitkom federal uyushmasi 26-avgust kuni eʼlon qilgan tadqiqotida maʼlum qildi. Tadqiqot doirasida kamida 10 nafar xodim ishlaydigan 1003 ta Germaniya kompaniyasi soʻrovdan oʻtkazilgan.
Maʼlumotlarga koʻra, soʻnggi 12 oyda kiberhujumlar, josuslik yoki diversiyaga duch kelgan kompaniyalarning 37 foizi kamida bitta jinoyat ortida xorijiy davlat maxsus xizmatlari turganini aniqlagan. Bu koʻrsatkich 2025-yilda 28 foizni, 2023-yilda esa atigi 7 foizni tashkil etgan.
Hujum sodir etilganini tasdiqlay olgan kompaniyalarning 52 foizi uning manbasini Xitoy bilan bogʻlagan. Yana 49 foiz kompaniya Rossiyaga olib boruvchi izlarni aniqlagan.
Yevropa Ittifoqiga kirmaydigan Sharqiy Yevropa mamlakatlari hujumlar manbasi sifatida 34 foiz holatda qayd etilgan. AQSH ulushi 27 foizni, Germaniyadan tashqari YEI davlatlari 12 foizni tashkil qilgan. Hujumlarning yana 12 foizida izlar Germaniyaning oʻziga olib borgan.
Bitkom Eronni iqtisodiy jinoyatlar sohasidagi «yangi va sezilarli oʻyinchi» deb atagan. Jabrlangan kompaniyalarning 9 foizi hujumlarda Eron bilan bogʻliq izlarni aniqlagan.
Shu bilan birga, kompaniyalarning aksariyati ularga qarshi hujumlar ortida uyushgan jinoiy guruhlar turganini maʼlum qilgan.
Bitkom rahbari Ralf Vintergerstning taʼkidlashicha, koʻplab mamlakatlarda uyushgan jinoyatchilik va maxsus xizmatlar oʻrtasidagi chegara tobora noaniqlashib bormoqda. Uning soʻzlariga koʻra, maxsus xizmatlar jinoiy tuzilmalardan foydalanishi, jinoyatchilarga esa siyosiy maqsadlarga mos nishonlarni tanlagan taqdirda erkin harakat qilish imkoniyati berilishi mumkin.
Tadqiqotda sunʼiy intellektdan kiberhujumlarda foydalanish masalasiga ham alohida eʼtibor qaratilgan. Kompaniyalarning 82 foizi jinoyatchilar hujumlarni amalga oshirishda sunʼiy intellektdan tobora koʻproq foydalanayotganini bildirgan.
Biroq respondentlarning 31 foizigina bunga ishonch bildirgan, 51 foizi esa sunʼiy intellekt qoʻllanayotganini taxmin qilgan. Kompaniyalarning 17 foizi esa sunʼiy intellektdan foydalanilganini kriminalistik ekspertiza orqali tasdiqlovchi dalillarga ega ekanini aytgan.
Sunʼiy intellektdan foydalanilganini koʻrsatuvchi belgilar orasida hujum urinishlarining avtomatik ravishda moslashishi eng koʻp - 53 foiz holatda qayd etilgan. Yuqori sifatli soxta audio va videolar 48 foiz, sifatli xabarlar va elektron maktublar 38 foiz, hujumlarning juda yuqori chastotasi 34 foiz hamda chuqur shaxsiylashtirilgan kontent 28 foiz holatda tilga olingan.
