Moskvada ishlayotgan 500 nafar o‘zbekistonlik ish beruvchi ustidan shikoyat qildi

Migratsiya agentligi xabariga ko‘ra, 2021 yil 26 aprel kuni agentlik vakillaridan iborat ishchi guruh mamlakatning Rossiyadagi elchixonasi mas'ul xodimlari bilan birgalikda voqea joyiga borib, vaziyatni o‘rgangan. 19 may kuni agentlikning Moskva shahridagi vakolatxonasida fuqarolar bilan uchrashuv bo‘lib o‘tdi.

Ma'lum bo‘lishicha, qurilish obektlarida ish beruvchi bilan o‘zaro kelishuv asosida ish boshlagan fuqarolarga ish haqi berilishi kechiktirilgan va bu holat ular noroziligiga sabab bo‘lgan.

Agentlik tomonidan yashash joyisiz qolgan fuqarolar bepul yotoqxona va 3 mahal ovqat bilan ta'minlangan, ishsiz qolganlarga boshqa ish joylari taklif qilingan.

Hozirgi vaqtda 500 nafarga yaqin fuqarolarning shikoyatlari asosida ular huquqlarini himoya qilish va ish haqini undirib berish maqsadida Moskva shahar prokuraturasi, Tergov qo‘mitasi hamda Mehnat inspeksiyalariga rasman murojaat qilingan.

“Shuningdek, ushbu yurtdoshlarimizning 25 foizdan ortig‘i nolegal tarzda ish faoliyatini olib borgani aniqlanib, Rossiyaning amaldagi qonunchiligi asosida ularni legallashtirish bo‘yicha zaruriy tavsiyalar berildi.

Tashqi mehnat migratsiyasi agentligi ushbu holat yuzasidan fuqarolarimizning huquqlarini himoya qilish va qonun doirasida ish haqini undirish bo‘yicha barcha zarur choralar ko‘rilishini ma'lum qiladi”, deyiladi xabarda.