10ta vaznning 6tasida oltin medal o‘zbekistonlik sportchilarga nasib etdi. O‘zbekiston terma jamoasining 3 nafar bokschisi Abdumalik Xalakov, Elnur Abduraimov va Sanjar Tursunov yarim finalda mag‘lubiyatga uchrab, bronza medallar bilan kifoyalanishgandi.
Finallar kunida dastlab 49 kg.gacha vazn toifasida Nodirjon Mirzaahmedov qozog‘istonlik Daniyal Sabitni 5:0 hisobida mag‘lub etib, chempionlikni nishonladi.
-52 kg vazn toifasida Shahobiddin Zoirov hindistonlik nomdor raqibi Amit Pangalni 3:2 hisobida mag‘lub etdi.
2018 yilgi Osiyo o‘yinlarida, 2019 yilgi jahon chempionati va Osiyo chempionatlarida g‘olib bo‘lgan Mirazizbek Mirzaxalilov (-56 kg) esa kutilmaganda mo‘g‘ulistonlik Xarku Enx-Amarga 3:2 hisobida mag‘lub bo‘ldi.
-69 kg vazn toifasidagi finalda Bobo-Usmon Baturov va Abilayxon Jusupov o‘zaro to‘qnash keldi. 1-raundda qozog‘istonlik bokschi jarohat sabab jangni davom ettira olmasligi ma'lum bo‘ldi va g‘alaba o‘zbekistonlik sportchiga berildi.
-75 kg vazn toifasida Saidjamshid Ja'farov qozog‘istonlik Abilxan Amanqul ustidan 4:1 hisobida g‘alaba qozondi.
-81 kg vazn toifasidagilar o‘rtasidagi finalda esa Dilshodbek Ro‘zmetov Eron vakili Meysam Geshlabini 3:2 hisobida mag‘lub etdi.
Osiyo chempionatining markaziy jangi +91 kg vazn toifasi vakillari Bahodir Jalolov va Kamshibek Kunkabayev o‘rtasida bo‘lib o‘tdi. Unda o‘zbekistonlik bokschi Qozog‘iston vakilini 5:0 hisobida mag‘lub etdi va Osiyo chempionati oltin medaliga ega chiqdi. Bu Bahodir Jalolov va Kamshibek Kunkabayev o‘rtasidagi o‘zaro 6-jang edi. O‘zbekiston vakili 4:2 hisobida ustun kelmoqda.
Turnirda uchta vazn toifasida g‘oliblik Mo‘g‘uliston vakillariga nasib etdi - Enh-Amar (56 kg), Tsendbaatar (60 kg), Chinzorig (64 kg), shuningdek, hindistonlik Sanjit (91 kg) ham oltin medalga ega chiqdi.
Qizlar o‘rtasida esa vakillarimiz musobaqani 8ta medal — 1ta oltin, 5ta kumush, 2ta bronza bilan yakunlashdi: Sitora Turdibekova (-57 kg, oltin), Gulasal Sultonaliyeva (-48 kg, kumush), Sitora Shogdarova (-54 kg, kumush), Navbahor Hamidova (-69 kg, kumush), Mavluda Mavlonova (-75 kg, kumush), Sohiba Ro‘zmetova (-81 kg, kumush), Mohinabonu Abdullayeva (-64 kg, bronza), Mohira Abdullayeva (+81 kg, bronza).
