O‘zbekistonga «Sputnik V» vaksinasining navbatdagi partiyasi olib kelindi

Bugun, 15 iyul kuni tunda O‘zbekistonga Rossiyadan koronavirusga qarshi «Sputnik V» vaksinasining 70 ming dozalik 1-komponenti, 20 ming dozalik 2-komponenti olib kelindi. Bu haqda SSV matbuot xizmati xabar bermoqda.

Shu kunga qadar «Sputnik V» vaksinasidan aprel oyida 2 partiya (uning 50 ming dozasi 1-komponent, 50 ming dozasi 2-komponent), iyun oyida 2 partiya (70 ming dozalik 1-komponenti va 70 ming dozalik 2-komponenti), iyul oyida 1 partiya (40 dozalik 1-komponenti) olib kelingan edi.

Ayni paytda O‘zbekistonda «Sputnik V» vaksinasi zaxirasi 370 ming dozaga yetdi. Jami vaksina zaxirasi 7 million 530 ming dozani tashkil qilmoqda. Shundan 660 ming dozasi AstraZeneca, 6,5 million dozasi ZF-UZ-VAC2001 vaksinasidir.

14 iyul holatiga ko‘ra, 5 million 275 ming doza vaksina emlash jarayonlarida qo‘llangan.

Sog‘liqni saqlash vazirligining axborot berishicha, joriy yilning 20-25 iyul kunlari ZF-UZ-VAC 2001 vaksinasidan yana 4 mln doza olib kelish rejalashtirilgan.

Shuningdek, avgust oyida «Sputnik V» vaksinasidan 160 ming doza hamda avgust-sentabr oylarida COVAX dasturi doirasida yana 660 ming doza (AstraZeneca yoki Moderna) vaksinalari olib kelinishi kutilmoqda.