12:22 / 16.08.2021
15821
Тошкентда шахмат афсоналари қатнашган халқаро турнир якунланди

Тошкентда «Zakovat-Gambit» турнирининг финал босқичи старт олгани ҳақида хабар бергандик. Бугун республика бўйлаб 4 минг нафарга яқин иштирокчилар қатнашган турнир ўз якунига етди. Кун давомида барча 5 та гуруҳларда финал беллашувлари бўлиб ўтди.

«Zakovat-Gambit» турнирига ташриф буюрган шахмат афсонаси, аёллар ўртасидаги мутлақ жаҳон чемпиони ва супер-гроссмейстер Юдит Полгар турнир ҳамда ундаги иштирокчилар маҳоратига юқори баҳо берди.

«Биринчи марта Ўзбекистондаман ва бундан жуда хурсандман. Турнир ажойиб ташкиллаштирилган. 20 нафар шахматчи ёшлар билан ўйнашга муваффақ бўлдим, уларнинг 10 нафари қизлар экани қувонарли.

Бу ерда бир қатор иқтидорли ёшларни учратдим, 25 ва 26-рақамдаги иштирокчиларнинг ўйини менга жуда ёқди. Улар ўйинни кўра олишади. Билишимча, Ўзбекистонда кўплаб шахмат мактаблари бор. Бу мени қувонтирди, чунки Венгрияда бу каби мактаблар кўп эмас. Мана энди ўзбекистонлик болакайлар ниманинг эвазига халқаро мусобақаларда катта натижаларга эришаётганини тушундим.

Сизларда жаҳон чемпиони Қосимжонов бор, жаҳон чемпиони бўлиш осон иш эмас. Бу ердаги болалар дунё шахмат тахтидан ҳали анча узоқда. Лекин бу ерда уларни чемпионга айлантира оладиган катта устозлар мавжуд», деди афсонавий шахматчи Полгар хоним.

Шахмат юлдузларига қарши нафақат шахматчиларимиз, балки спорт оламида таниқли бўлган шахмат ихлосмандлари ҳам ўйин ўтказишга муваффақ бўлдилар. 

«Қизиқарли партия бўлди. Бошида ҳаяжон босиб, битта муҳим фигурамни бой бериб қўйганимдан сўнг, ўйиним орқага қараб кетди. Натижада босим остида қолдим. Кўпчилик кутганидек, мағлубиятга учрадим. Лекин мен бу ерга натижа учун келмагандим. Асосий мақсадим жаҳон шахмати ва спорти юлдузлари билан кўришиш эди.

Бунақа имконият олдин бўлмаганди. Мана шундай имкониятдан фойдаланиб, нафақат улар билан кўришиш, балки шахмат ўйнаш имкониятига ҳам эга бўлдим. Бундан жуда ҳам хурсандман», деди спорт шарҳловчиси, Юдит Полгарга қарши дона сурган Даврон Файзиев. 

Турнир якунларига кўра, ўз гуруҳларида юқори поғоналарни эгаллаган шахматчиларга совринлар топширилди. 1-ўрин соҳиблари 50 млн, 2-ўрин 30 млн ва 3-ўрин эгалари 20 млн сўмдан пул мукофотларига эга бўлишди. Шунингдек, қизлар ўртасидаги мусобақаларда ажойиб иштирок этган 4 нафар қиз 20 млн сўмдан пул мукофотига эга бўлдилар.

Top