Toshkent xalqaro aeroportida delegatsiya a'zolariga zar choponlar kiydirildi. U yerda sportchilar jurnalistlarga intervyu berib, o‘z hissiyotlari bilan o‘rtoqlashishdi.
Bronza medalini qo‘lga kiritgan para-dzyudochi Sharif Xalilov hayajonda ekanligini yashirmadi:
«Juda hayajondamiz. Kichik mashaqqatimiz uchun bunchalik e'tibor bo‘ladi, deb o‘ylamagandik.
Bronza uchun kurashda braziliyalik raqib bilan kechgan bellashuv ancha qiziqarli o‘tdi. Jang yakuniga 5 soniya qolganida ham yutqazayotgandim. Alloh o‘zi kuch berdi. Shuningdek, prezidentimizning bizni qo‘llab-quvvatlab aytgan gaplari motivatsiya bo‘ldi».
Paralimpiya chempioniga aylangan para-taekvondochi Guljanoy Naimova g‘alaba osonlikcha qo‘lga kiritilmaganini ta'kidladi:
«Turnir startida sinovlarga duch keldik: bir necha sportchilarimiz koronavirusga chalindi. Ularga dalda berib turdik. Bir-birimizni qo‘llab-quvvatladik.
Jangga chiqib borar ekanman, barchaga bergan va'dalarim, ota-onamning ishonchi ko‘z oldimga keldi. Biroz ortga chekinish ham bo‘ldi, chunki Paralimpiadaga kuchli sportchilar keladi. Ammo delegatsiya a'zolarining ruhiy ko‘magi bilan g‘alabaga erishdim va ayollar o‘rtasida Olimpiada/Paralimpiada tarixida g‘olib bo‘lgan ilk o‘zbek sportchisiga aylandim».
Yana bir chempion, para-yengil atletikachi Boburjon Omonov Parijda ham yuqori natijalarga erishishni jiddiy maqsad qilgan:
