Meksikada mehmonxonadan 20 nafar xorijlik o‘g‘irlab ketildi

Prokuratura boshlig‘i Federiko Erreraning ta'kidlashicha, voqea yuz bergan Mateuala shahriga tergov o‘tkazish va o‘g‘irlab ketilgan xorijliklarni topishda yordam berish uchun prokuratura xodimlari jo‘natilgan.

Guvohlarning ma'lum qilishicha, bosqinchilar mehmonxonaga 3ta avtomobilda kelib, xorijliklarni noma'lum yo‘nalishda olib ketishgan. Ta'kidlanishicha, o‘g‘irlangan xorijliklar orasida Haiti va Venesuela fuqarolari bor.

Har yil zarur hujjatlarsiz bo‘lgan yuz minglab muhojirlar Meksika orqali AQShga o‘tishga harakat qiladi. Ular bu yo‘lda ko‘pincha jinoiy guruhlar va odam savdogarlari qurbonlariga aylanadi. 29 avgustda Meksika prezidenti Andres Manuel Lopes Obrador hukumat migratsiya oqimini to‘xtatishni davom ettirishini, ammo buning uchun avvalambor odamlarni o‘z davlatlarini tark etishga majbur qiluvchi muammolarni hal qilish lozimligini aytgan.