AQShdagi qattiq qoʻriqlanadigan qamoqxonalarning birida mashhurlikda Pablo Eskobardan qolishmaydigan narkobaron saqlanmoqda. «El-Chapo» laqabli bu jinoyatchi Meksikadagi yirik narkokartelga rahbarlik qilgan. U asos solgan toʻda hamon faoliyat koʻrsatmoqda va dunyo boʻylab giyohvand moddalar tarqatishda davom etyapti. Toʻdaboshi esa dahshatli Alkatrasda.
Har yili AQShga juda katta miqdorda giyohvand moddalar kirib boradi, chunki talab yuqori. Narkotik asosan Kolumbiya va yana baʼzi Janubiy Amerika davlatida tayyorlanib, turli yoʻllar bilan Karib havzasi va Markaziy Amerika davlatlari orqali AQShga olib kiriladi. Bu logistika zanjirining eng muhim boʻgʻini – Meksika kartellari. «Qahramonimiz» Xoakin Gusman ana shunday narkokartellardan biri «Sinaloa»ga asos soladi.
Giyohvand moddalar orasida ulgʻaygan bola
Xoakin Gusman 1957-yilda Meksikaning Sinaloa shtatida qashshoq bir qishloq oilasida tugʻiladi. Oila apelsin sotib kun koʻrar, boʻlajak kartel rahbari kattalarga yordamchi edi. Xoakinning otasi mahalliy narkokartel aʼzosi boʻlib, giyohvand moddalar yetishtirish va sotish bilan ham shugʻullanardi. Koʻp oʻtmay ota Xoakinni «ota kasbini davom ettirsin deb» opiy va kannabis yetishtirishga jalb qiladi. Shu-shu bola yoshligidan giyohvand moddalar ichida katta boʻladi.
1980-yillarda Xoakin Meksika narkobaronlarining «choʻqintirgan otasi» Migel Galyardoning «Gvadalaxara» karteliga qoʻshiladi. Avvaliga oddiy yugurdak boʻladi, keyinroq ishonchga kirgach, Kolumbiyada tayyorlangan narkotikni Meksika orqali AQShga tashishdek «masʼuliyatli ishga» bosh boʻladi.
Narkokartel rahbari
1989-yilda «Gvadalaxara» karteli rahbari Migel Galyardo hibsga olinib, toʻda bir nechta mustaqil guruhga boʻlinib ketadi. Vaziyatdan foydalangan Xoakin sheriklari va qoʻl ostidagi yigitlar bilan «Sinaloa» karteliga asos soladi. Toʻdaboshi Xoakin Gusman «El-Chapo», yaʼni pakana laqabini oladi. Chunki uning boʻyi 168 sm edi.
1990-yillarda «Sinaloa» karteli faoliyatini kengaytiradi. «El-Chapo» topqirligi evaziga giyohvand moddalar tarqatish industriyasiga bir qator yangiliklar olib kiradi. Meksika va AQSH chegarasi ostida elektrlashtirilgan, ventilyatsiya tizimiga ega va relsli maxfiy yerosti yoʻlaklari quradi. Kolumbiyada tayyorlangan kokain, geroin, metaamfetamin va marixuanani chegaradan oʻtkazish uchun suvosti kema, samolyot, poyezd hamda yuk mashinalaridan foydalanadi.
