Adliya vazirligi ijrosi ta'minlanmayotgan prezident hujjatlari yuzasidan murojaatlarni qabul qilishni boshladi

Adliya vazirligi tomonidan prezident hujjatlarining o‘z vaqtida va to‘liq ijro etilishi nazorat qilib boriladi. Bu haqda vazirlik Telegram-kanalida xabar berildi.

Ma'lum qilinishicha, prezident farmonlarining ijro etilmayotgani holati bo‘yicha tezkor murojaat yo‘llash uchun Adliya vazirligi tomonidan @ijronazorati_bot telegram boti ishga tushirilgan. Shuningdek, vazirlik o‘z vakolatlari doirasida kelib tushgan murojaatlar asosida choralar ko‘rib borishini ma'lum qildi.

“Sizning farovon hayot kechirishingiz uchun qabul qilingan prezident hujjatlari bajarilmayotganligi holatlariga befarq bo‘lmang va o‘zingiz duch kelgan shunday holatlar bo‘yicha ushbu bot orqali murojaat yo‘llang. Bu bilan siz hujjatlarning amalda ijro etilishiga hissa qo‘shgan bo‘lasiz”, deyiladi xabarda.

Prezident Shavkat Mirziyoyevning 2020 yil 29 dekabrdagi Murojaatnomasida Adliya vazirligiga qabul qilingan hujjatlarni mas'ullarga yetkazish, amaliyotda qo‘llashga ko‘maklashish va nazorat qilish bo‘yicha yangi tizim joriy etish vazifasi topshirilgan edi.

Shuningdek, 2021 yil yanvar oyida oyida prezident boshchiligida o‘tkazilgan yig‘ilishda so‘nggi 4 yilda qabul qilingan 2 mingga yaqin farmon va qarorlarning ijrosi hudud va tashkilotlarda qoniqarli emasligi ta'kidlangan.

Yig‘ilishda qarorlar ijrosini nazorat qilishning eng unumli vositasi – jamoatchilik ishtiroki va nazorati ekanligi qayd etilgan hamda jismoniy va yuridik shaxslarga prezident hujjatlari ijrosi yuzasidan murojaat qilish imkonini beradigan mobil ilova ishga tushirilishi belgilangandi.

Bundan tashqari, Adliya vazirligiga Nodavlat notijorat tashkilotlari milliy assotsiatsiyasi, «Ijtimoiy fikr» markazi bilan birga aholi o‘rtasida ijtimoiy so‘rovlar o‘tkazish, qarorlar ijrosi va bunga xalq munosabatini o‘rganish vazifasi qo‘yilgan, bu maqsadlar uchun alohida grantlar joriy qilinishi aytilgan.