12:38 / 01.10.2021
10053
Ўзбекистонга яна бир «Афросиёб» тезюрар поезди олиб келинди

“Афросиёб” электропоездининг ҳаракатланувчи таркиби Тошкентга етиб келди. Бу ҳақда “Ўзбекистон темир йўллари” ахборот-таҳлилий медиа маркази хабар берди.

2019 йилнинг июнь ойида «Ўзбекистон темир йўллари» АЖ Испаниянинг Patentes Talgo S.L.U. компанияси билан Talgo-250 серияли иккита тезюрар электропоезд сотиб олиш учун шартнома имзолаганди.

Келишувларга кўра, бу йил октябрь ойигача «Ўзбекистон темир йўллари» АЖ локомотив паркини иккита тезюрар «Афросиёб» электропоезди билан тўлдириш керак эди. 

Электропоездларнинг биринчиси шу йилнинг июлида аввалига Испаниянинг Бильбао шаҳридан кема орқали Россиянинг Санкт-Петербург шаҳрига олиб келинган, 24 июль куни Тошкентга етиб келганди.  Иккинчи поезд шу йилнинг 16 сентябрида Россияга келган ва Ўзбекистон томон йўлга чиққанди.

Шу тариқа,  Patentes Talgo S.L.U. компанияси ўз мажбуриятларини тўлиқ ва ўз вақтида бажарди.

Ушбу ҳаракатланувчи таркиб олтинчиси бўлиб, инвестиция лойиҳаси доирасида сотиб олинган. Лойиҳага кўра, иккита поезддан ташқари, испан компанияси тўртта захира эконом-класс вагонлари, шунингдек, поездларга техник хизмат кўрсатиш учун ускуналар етказиб беради. Шартнома Испания компанияларининг корпоратив халқаро жамғармаси кредити ҳисобидан молиялаштирилади.

Top