Rossiya armiyasi 16-sentabr kuni Ukrainaning Dnipropetrovsk viloyati Nikopil tumanida qatnovchi yoʻlovchi avtobusiga dron bilan zarba berdi. Bu haqda Deutsche Welle mahalliy rasmiylarga tayanib xabar berdi.
Dnipropetrovsk viloyati harbiy maʼmuriyati rahbari Aleksandr Ganjaning maʼlum qilishicha, hujum oqibatida besh kishi halok boʻlgan, yana kamida yetti kishi jarohatlangan.
Yoʻlovchi poyezdiga ham zarba berildi
Shuningdek, Rossiya qoʻshinlari Kiyev–Mikolayiv yoʻnalishida qatnaydigan 122-sonli yoʻlovchi poyezdiga zarba bergan.
«Ukrzalіznitsya» temiryoʻl kompaniyasi maʼlumotiga koʻra, monitoring guruhi xavf haqida oldindan ogohlantirgan. Shu sababli lokomotiv va poyezd brigadalari hamda barcha yoʻlovchilar oʻz vaqtida evakuatsiya qilingan.
Hujum oqibatida odamlar jabrlanmagan. Evakuatsiya qilingan yoʻlovchilar manziliga yetib olishi uchun avtobuslar tashkil etilgan.
Kiyevda bir kishi jarohatlandi
16-sentabrga oʻtar kechasi Rossiya qoʻshinlari Kiyevga ham reaktiv dronlar bilan hujum qilgan.
Kiyev meri Vitaliy Klichkoning maʼlum qilishicha, Svyatoshinskiy tumanidagi ombor binosida yongʻin kelib chiqqan. Hujum oqibatida bir kishi jarohatlanib, shifoxonaga yotqizilgan.
Ukraina Favqulodda vaziyatlar davlat xizmati Xersonda ham Rossiyaning FPV-droni yengil avtomobilga zarba berganini bildirdi. Zarba oqibatida avtomobil yonib ketgan, keyinchalik yongʻin oʻchirilgan. Ushbu hodisada jabrlanganlar qayd etilmagan.
Ukraina HHK: Rossiya 80 ta dron bilan hujum qildi
Ukraina Qurolli kuchlari Harbiy-havo kuchlari maʼlumotiga koʻra, 16-sentabrga oʻtar kechasi Rossiya Ukraina hududiga 80 ta zarbdor uchuvchisiz uchish apparati bilan hujum qilgan.
Ukraina tomoni 63 ta dron havo hujumidan mudofaa vositalari bilan urib tushirilgan yoki bostirilganini maʼlum qildi.
Harbiy-havo kuchlariga koʻra, yettita joyda dronlar nishonga tekkani, yana ikkita hududda esa urib tushirilgan apparatlar parchalari yerga qulagani qayd etilgan.
