16:34 / 06.10.2021
1643
Сенат раиси Танзила Норбоева Хоразмда бўлди

Олий Мажлис Сенати раиси Танзила Норбоева 6 октябрь куни Хоразм вилоятига ташриф буюрди.

Фото: Урганч шаҳар ҳокимлиги

Дастлаб у Урганч шаҳар ҳокими Ойбек Холбоев ҳамроҳлигида «Ишга марҳамат» мономаркази фаолияти билан танишди. Тингловчилар билан хусусий ва кичик бизнес, оилавий тадбиркорлик, ҳунармандчиликни ривожлантириш масалалари, муаммолари тўғрисида суҳбатлашди. Тадбиркорларга яратилаётган имкониятлар ва имтиёзлардан унумли фойдаланиш ва янги иш ўринларини ташкил этиш чора-тадбирларига алоҳида урғу бериб ўтди.

Фото: Урганч шаҳар ҳокимлиги

Сенат раиси Урганч тумани ҳокими Фрунзе Шарипов ҳамроҳлигида «Туркманлар» маҳалласидаги «Улли ҳовли» ёдгорлик мажмуасига борди ва тарихий экспонатлар билан танишди. Шунингдек, туркман аёллари ва «Аёллар дафтари»да турган хотин-қизлар билан учрашиб, уларнинг муаммолари ва таклифларини эшитди.

Фото: Урганч тумани ҳокимлиги 

Сўнгра, Янгибозор туманидаги «Оча қалъа» маҳалласида «Аёллар маслаҳат кенгаши» аъзолари ва фаол аёллар билан учрашиб, хотин-қизларга оид масалалар, бугунги ислоҳотлар ва муаммолар ҳақида суҳбатлашди.

Фото: Урганч тумани ҳокимлиги

Шундан сўнг, Танзила Норбоева Янгибозор туманида янги кутубхонанинг тантанали очилиши маросимида иштирок этди. Тадбирда туман ҳокими Ўктам Қурбонов, бир гуруҳ фаоллар ва ёшлар ҳам қатнашдилар. 

Фото: Янгибозор тумани ҳокимлиги

Маънавият ва маърифат масканида очилган кутубхонада 100 мингдан зиёд турли адабиётлар тўпланган. Алишер Навоий номидаги миллий кутубхона билан интернет орқали тўғридан-тўғри алоқа ўрнатилган. 

 Фото:  Янгибозор тумани ҳокимлиги
Top