“Obodlikni o‘z xonadonimizdan boshlashimiz kerak” - prezidentlikka nomzod Narzullo Oblomurodov

Nomzod viloyatning bir nechta tumanlarida uchrashuvlar o‘tkazib, an'anaga ko‘ra daraxt ekish aksiyasini boshlab berdi. So‘ng respublika bo‘ylab o‘tkazilayotgan “Keksalar haftaligi” doirasida mahalla nuroniylari bilan uchrashdi.

Narzullo Oblomurodov Do‘stlik tumanidagi mahallalarda bo‘lib, mahalla ahlining kayfiyati, yashash tarzi, bu yerdagi o‘zgarishlar bilan qiziqdi va mahalla obodligi borasida ham o‘z fikr-mulohazalarini bildirib o‘tdi.

“Biz o‘zgarishlarni, obodlikni birovlardan kutishimiz kerak emas. Hammamiz o‘zgarishlarni o‘z xonadonimizdan boshlashimiz kerak. Obodlik, avvalo, har bir insonning ko‘nglidan boshlanadi. Oddiy bir devorni ta'mirlash va bo‘yash yoki ko‘chat o‘tqazish ham xonadonimizga o‘zgacha bir ko‘rk beradi”, – dedi u.

Narzullo Oblomurodov saylovchilarni o‘z saylovoldi dasturi bilan tanishtirar ekan, global iqlim o‘zgarishlari, yildan yilga kamayib borayotgan tabiiy resurslar, chiqindilar muammosi va aynan Jizzax viloyatida bu sohada qilinishi kerak bo‘lgan vazifalarga ham to‘xtalib o‘tdi.

“Yurtimizning har bir hududida yashillikni saqlash nihoyatda muhim. Chunki iqlim o‘zgarishi oqibatida yozning issiq kelishi, anomal iqlim o‘zgarishlari insonlar sog‘ligiga, qishloq xo‘jaligi faoliyatiga, bir so‘z bilan aytganda butun Yer yuzidagi hayotiy jarayonlarga salbiy ta'sir ko‘rsatadi. Bu yilgi Nobel mukofoti sovrindorlari qatorida iqlim o‘zgarishlari bo‘yicha tadqiqotlar olib borgan bir necha olimlarning borligi ham ushbu muammoning qanchalik dolzarbligini isbotlab turibdi”, – dedi Ekopartiya nomzodi.