Narzullo Oblomurodov institut prorektori sifatida ish boshladi

Narzullo Oblomurodov Toshkent moliya instituti ilmiy ishlar va innovatsiyalar bo‘yicha prorektori lavozimiga tayinlandi. Bu haqda OTM saytida xabar berilgan.

Narzullo Oblomurodov 1975 yil Samarqand viloyati Urgut tumanida tug‘ilgan. 1996 yilda Toshkent Jahon iqtisodiyoti va diplomatiya universitetini, 2000 yilda Birminghem universitetini tamomlagan. Mutaxassisligi bo‘yicha olim-iqtisodchi, iqtisod fanlari nomzodi, dotsent.

2000 yildan O‘zbekiston oliy ta’lim tizimida faoliyat ko‘rsatgan, xususan, Toshkent moliya instituti, Toshkent to‘qimachilik va yengil sanoat institutida ilmiy xodim, kafedra mudiri, fakultet dekani lavozimlarida ishlagan.

Shuningdek, bank-moliya sohasida, davlat organlari tizimida, jumladan prezident administratsiyasi huzuridagi Fuqarolar huquqlarini himoya qilish, jismoniy va yuridik shaxslar murojaatlari bilan ishlashni nazorat qilish va muvofiqlashtirish xizmatida ham ishlagan.

2020 yil aprelida O‘zbekiston Ekologiya partiyasi raisi birinchi o‘rinbosari bo‘lgan, 2021 yil fevralida partiya raisiga aylangan va o‘sha yil oktyabridagi O‘zbekiston prezidentligi uchun saylovlarda nomzod sifatida qatnashib, besh nomzod orasida to‘rtinchi o‘rinni olgandi. Saylovdan ko‘p o‘tmasdan, 2021 yil dekabr oyi oxirida Ekologiya qo‘mitasi raisi lavozimiga o‘tgandi.

2023 yil yanvarida esa hukumatdagi qisqartirishlar doirasida qo‘mita tugatilgan, O‘zbekiston tabiat resurslari vazirligi tashkil etilib, unga Aziz Abduhakimov rahbar bo‘lgan, Oblamurodov uning o‘rinbosariga aylangandi. 2023 yil iyun oyida esa ushbu vazirlik Ekologiya, atrof-muhitni muhofaza qilish va iqlim o‘zgarishi vazirligi sifatida qayta nomlangan, Oblomurodov boshqa ishga o‘tishi munosabati bilan vazir o‘rinbosarligini tark etgandi.

Shuningdek, institut kuzatuv kengashi tomonidan iqtisod fanlari doktori, professor Olimnazar Islomqulov Xalqaro hamkorlik bo‘yicha prorektor etib tayinlandi.