Бухородаги Bukhara Desert Oasis экотуризм кластерида «Заковат» интеллектуал Брейн-ринг мусобақасининг финал босқич ўйинларига старт берилди.
Бу босқичга ҳудудий мусобақаларда омадли иштирок этган 4тадан жамоа етиб келган.
Бухородаги босқичда 11 вилоятнинг 44та энг кучли жамоалари, шунингдек, Тошкент ва Тошкент вилояти ва Самарқанддан аниқланган 2 та ғолиб жамоаси (бу уч ҳудудда якуний ғолиблар аниқлаб бўлинган) иштирок этмоқда.
Биринчи босқичда ҳар бир вилоят жамоалари ўзаро баҳс олиб боришмоқда. Биринчи ўринни эгаллаган вилоятлар ғолиблари 100 миллион сўмдан мукофот олади. Иккинчи ўрин учун 20 миллион сўмлик, учинчи ўрин учун 10 миллион сўмлик мукофот тақдим этилади.
Бугунги ўйинларда ҳозирча учта ҳудуд - Андижон, Бухоро ва Фарғона вилоятлари бўйича ғолиблар аниқланди.
Андижон вилояти бўйича финал «Бургутлар» ва 66-жамоа ўртасида кечди ва унда икки ўйинда «Бургутлар» 5:0 ва 4:2 ҳисобларида устун келди.
Бухоро вилояти бўйича 93-жамоа «Бермуд» жамоасидан икки ўйинда 4:2 ва 4:0 ҳисобларида устун келди.
Фарғона вилояти бўйича «Ёшлар ишлари агентлиги» жамоаси «Немесис»ни 5:1 ва 2:1 ҳисобларида мағлуб этди.
Иккинчи босқичда аниқланган 11 ғолиб ва иккита маълум жамоа «Заковат» гранд финалида қатнашиш ҳуқуқи учун ўзаро кураш олиб боради, унда фақат биринчи ва иккинчи ўринларни эгаллаган жамоалар қатнашади.
Гранд-финал учун соврин сифатида 6та 3-позиция Lacetti автомашинаси тақдим этилади.
Суратлар манбаси: Миллий масс-медиани қўллаб-қувватлаш ва ривожлантириш жамоат фонди матбуот хизмати
