Uzbek.life portalining bu galgi suhbatdoshi AQShda qariyb 24 yildan buyon istiqomat qilayotgan o‘zbekistonlik tadbirkor, “My IT education” kompaniyasi rahbari Jon Toshmatov bo‘ldi.
Muvaffaqiyat ortidagi qiyinchiliklar
Men Farg‘ona viloyatida tug‘ilib o‘sganman. O‘rta maktabni tugatgach, Farg‘ona politexnika institutida tahsil oldim. Bolalikda kosmonavt bo‘lish orzuim bo‘lgan. Lekin keyinchalik, AQShga borganimda xonadosh do‘stim sabab aynan IT sohasiga qiziqib qolganman.
Endi o‘ylab qarasam, 24 yil avval Qo‘shma Shtatlarga borib aeroportidan tushishim bilan ilk mustaqil hayot va qiyinchiliklar boshlangan ekan. Amerika deganda ko‘pchilikning xayolida o‘z shaxsiy mashinasiga ega bo‘lish, uy sotib olish yoki muvaffaqiyatli karera qilish keladi. Lekin hamma joyning o‘z qonun-qoidalari bor. O‘z o‘rningizni topib ketguningizcha sizda turli qiyinchiliklar bo‘ladi. AQShga ilk borgan kunimda menda yangi atmosfera va ijtimoiy muhitga ko‘nikish, ish, o‘qish va pul bilan bog‘liq muammolar boshlangan. Birinchi anglagan narsam, mening ingliz tilini bilish darajam ancha kamlik qilarkan. Meni maqsadim ilm olish bo‘lgani bois, kechqurunlari ham qo‘shimcha ishlardim. Restoranda idish yuvgan, fermada tinimsiz ishlagan va ertalabgacha haydovchilik qilgan kunlarimda o‘qishni tashlayman degan vaqtlarim bo‘lgan. Biroq maqsadga erishish, holatimni o‘zgartirish va o‘zimning yaxshi kasbimni topishga bo‘lgan intilish menga qiyinchiliklarni yengib o‘tishda eng kuchli motivatsiya bergan. Men uchun og‘ir mehnatni aqliy mehnatga aylantirish juda muhim bo‘lgan.
Amaliyot nazariyadan muhim
Ta'lim jarayonini kuzatarkanman, ko‘pincha nazariyaga e'tibor berilishi bilangina yaxshi kadrlar yetishib chiqmaydi. Meni fikrimcha, har qanday kasbni egallashda amaliyot juda muhim. Masalan, IT sohasini oladigan bo‘lsak siz Java, C++, Frontend kabi dasturlash tillarini nazariy jihatdan yaxshi bilsangiz-u, lekin amaliyotda sinab ko‘rmagan bo‘lsangiz yaxshi mutaxassis bo‘lolmaysiz. Tajriba va haqiqiy ish muhiti aslida insonni yaxshi mutaxassis sifatida shakllantiradi. Shu boisdan men ta'lim jarayonida 40 % nazariya va 60 % amaliyot deb hisoblayman.
