«Roma»dagi asosiy maqsad, Mourinoning boshqalardan farqi, «Paxtakor»ga o‘tmagani, Babayan, Kuper, Abramov va Katanets davri taqqosi – Shomurodov bilan intervyu
|17:13 / 16.11.202115 67810 min
Foto: Tribuna.uzFoto: Tribuna.uz
O‘zbekiston milliy jamoasi hujumchisi Eldor Shomurodov Toshkentdagi yig‘indan keyin «Sport» telekanaliga bergan intervyusida o‘z vaqtida «Paxtakor» va «Nasaf»ga o‘tmagani, milliy jamoadagi murabbiylar davri, Italiyadagi faoliyati, «Roma» bosh murabbiyi Joze Mourinoning o‘ziga xos jihatlari va Abraham bilan raqobat haqida gapirib o‘tdi.
«Paxtakor» va «Nasaf»ga o‘tmagani hamda agentlari haqida
O‘zbekiston milliy jamoasi hujumchisi suhbat avvalida dastlab «Mash'al»dan nega aynan «Bunyodkor»ga o‘tganini tushuntirib, agentlari haqida ham iliq so‘zlarni aytdi. Eldor Shomurodov 2014 yilgi mavsum oldidan «Mash'al»dan «Bunyodkor» safiga o‘tgandi. O‘shanda Toshkent klubi Shomurodov va Otabek Shukurov uchun Muborak klubiga jami 300 million so‘m transfer puli to‘lagan.
Foto: Bunyodkor FK
- Chindan ham «Paxtakor» va «Nasaf»dan ham qiziqish va taklif bo‘lgan. Ammo o‘shanda «Bunyodkor»ga Sergey Lushchan sababli o‘tganman. Bu murabbiy bilan yoshlar jamoasida qisqa vaqt ishlab, qanday murabbiy ekanligini yaxshi bilganman. Shu bois Sergey Ivanovich boshqarayotgan «Bunyodkor»ga o‘tgandim. Chunki bu murabbiyga ishonganman.
Agentlarim bilan qachondan ish boshlaganman? «Rostov»ga ko‘chib o‘tishimdan bir yil avval ish boshlaganman. Xudoga shukurki, bu borada omadim kelgan, deb ayta olaman. To‘g‘risini aytsam, agentlarimga o‘zimga ishongandek ishonaman. Chunki ular bilan boshidan kelajagim haqida rejalar tuzib, hozirgi darajamgacha yetib keldim.
«Babayan davrida JChga juda yaqin kelganmiz. Abramov davrida tarkib almashib ketgandi»
O‘zbekiston milliy jamoasi hujumchisi bosh jamoamizni boshqargan murabbiylar davrini taqqoslab, Babayan davrida mundialga yaqin kelganimiz, Kuperga omad yetishmagani, Abramov davriga kelib aksariyat tajribali o‘yinchilar milliy jamoani tark etib ulgurgani natijaga ta'sir qilgani, Katanetsga esa vaqt kerakligi haqida gapirdi.
- Milliy jamoada faoliyatimni boshlagan davrga to‘g‘ri kelgan Samvel Babayan boshqaruvida O‘zbekiston jahon chempionatiga chiqishga juda yaqin kelgandi. Shu jihatdan ayta olamanki, o‘shanda yaxshi natijalarga erishganmiz, faqat oxirida nimadir yetishmagan va mundialga chiqa olmagandik.
Mavzuga oid
Foto: O‘FA
Ektor Kuper kelgach, 2019 yil Osiyo kubogida ishtirok etdik, ammo Avstraliyaga qarshi chorakfinal bahsida penaltilar seriyasida mag‘lub bo‘ldik. O‘shanda omad kulib boqqanida biz uzoqroqqa borardik.
Foto: O‘FA
Vadim Abramov davrida juda ko‘p narsa almashib ketgandi. Masalan, Babayan va Kuper davrida to‘p surgan ko‘pgina futbolchilar allaqachon almashgan va buning natijasida jamoaviy o‘yinimiz yo‘qolib qolgandi. Oqibatda jamoa kuchsizlangandi.
Abramovning ikkinchi marta milliy jamoaga kelishi xatomidi? Agar 3-saralash bosqichiga chiqa olganimizda hech kim bunday demagan bo‘lardi. Pandemiyaning ham ta'siri bo‘ldi, deyish mumkin. Chunki ko‘p narsa o‘zgarib ketdi.
Katanets haqida gapiradigan bo‘lsam, bu murabbiyning mashg‘ulotlari Yevropadagi murabbiylarning ko‘rsatmalariga juda o‘xshaydi. Mashg‘ulotlari intensiv va qiziq o‘tadi. Ammo hozirda milliy jamoa deyarli yangilanayotgani bois bu mutaxassisga ham vaqt kerak bo‘ladi.
Milliy jamoadagi o‘rni va hujumdagi raqobat haqida
27 yoshli hujumchi intervyu davomida milliy jamoadagi o‘rni va hujumdagi raqobat haqida ham fikr bildirdi.
- Milliy jamoada barcha uchun talab bir xil bo‘ladi. Bu yerda tarkib doim almashib turadi, hech kimni alohida ko‘rsatib bo‘lmaydi. Masalan, ertaga men ham almashishim mumkin. Murabbiy hujum chizig‘idan ko‘nglim to‘q, himoya haqida tashvishdaman deyishi mumkin, ammo men bunday deya olmayman. Chunki biz bir oilamiz. Natija uchun barcha javobgar.
Foto: O‘FA
Milliy jamoada ham raqobatni sezyapman. Igor Sergeyev yaxshi sport formasida, yoshlardan mana Husayn Norchayev o‘tgan yig‘inlarda ham qatnashib, o‘zini yaxshi ko‘rsata oldi. Raqobat har doim bo‘lgan.
Ramziy jamoasidan faqat Ignatiy Nesterov o‘rin oldi
Eldor Shomurodovdan milliy jamoada to‘p surgan eng yaxshi futbolchilar orasidan ramziy jamoa tuzish so‘ralganda, hujumchi bu borada hali o‘ylab ko‘rmaganini aytib, faqat bir futbolchi nomini kiritib, qolganlarni aytishni istamadi.
Foto: O‘FA
- Ramziy jamoani tuzishim qiyin. Chunki bu haqda o‘ylab ko‘rganim yo‘q. Hozircha faqat darvoza chizig‘iga Ignatiy Nesterovni qo‘yaman. Markaziy himoyachilar? Bilmadim, bu haqda keyingi intervyulargacha o‘ylab ko‘rarman.
Abraham bilan raqobat va «Roma»da o‘tkazgan eng yaxshi o‘yini haqida
Eldor suhbat davomida «Roma» hujum chizig‘idagi raqobatchisi Temmi Abraham va klubi safida hozirgacha o‘ziga yoqqan o‘yini qaysi ekanini ham aytdi.
- Temmi Abraham ajoyib hujumchi. U «Roma»ga kelgunga qadar ham «Chelsi» safida yaxshi tajriba to‘plagan va yosh bo‘lishiga qaramay o‘zini ko‘rsatgandi. Temmi bilan mashg‘ulotlarda ham kelishib, birgalikda harakat qilamiz.
Foto: Getty Images
«Venetsiya»ga qarshi o‘yinda asosiy tarkibda birgalikda harakat qilganimizni kutilmaganda ro‘y berdi, demagan bo‘lardim. Murabbiyning har bir o‘yin uchun o‘z rejasi bo‘ladi va o‘sha o‘yinda birga tandem bo‘lganimiz rejalarning bir qismi deb o‘ylayman.
Raqobatchim bilan tandemda harakat qilib o‘zimni yaxshi his qildim, deya olaman. Umuman olganda, jamoada birga harakat qilamizmi yoki yo‘q, bu boradagi raqobat haqida o‘ylamaymiz. Chunki umumiy maqsadimiz bir – sovrin yutish. Shu bois bu masalada egoistlikni bir chetga surib, jamoa foydasini o‘ylaysiz.
«Roma» safidagi qaysi o‘yinda o‘zimni juda yaxshi his qildim? Bu Konferensiyalar ligasi 1-turi doirasidagi bahs edi («Roma» - TsSKA Sofiya – 5:1). O‘shanda yirik hisobda g‘alaba qozongandik.
Mourinoning boshqa murabbiylardan farqi haqida
«Roma» hujumchisi jamoa ustozi Joze Mourinoning boshqa murabbiylardan ajralib turuvchi jihatlari haqida ham to‘xtaldi.
- Eng avvalo, Mourinoning xarakteri boshqa murabbiylardan umuman farq qiladi. Juda hissiyotga beriluvchan, o‘yin paytida ham kerakli vaqtda «yorilishi» mumkin. Bu jihatdan ham o‘zgacha murabbiy. Qolaversa, juda kuchli taktik degan bo‘lardim. Joze bilan ko‘p emas, ammo ish jarayonida gaplashib turaman.
Foto: Getty Images
«Asosiy maqsad – A Seriyada to‘rtlikka kirish va YeChLga yo‘llanma olish»
Eldor Shomurodov rimliklar safidagi joriy mavsumdagi asosiy maqsadi haqida ham to‘xtalib o‘tdi.
- Bu mavsumdagi asosiy maqsad – «Roma» bilan A Seriyada kuchli to‘rtalikdan joy olish va Chempionlar ligasiga yo‘llanmani qo‘lga kiritishdir. Bu borada yaxshi imkoniyatlarga egamiz. Buni Mourinoning o‘zi ham aytib o‘tgandi.
Blits-savollarga Eldor Shomurodovning javobi:
- Spagettimi yoki osh?
- Osh.
- Rostovmi yoki Genuya shahri?
- Genuya.
- Muborak yoki Jarqo‘rg‘on?
- Jarqo‘rg‘on.
- «Roma» yoki «Chelsi»?
- «Roma».
- Torres yoki Drogba?
- Drogba.
- 1-bo‘lim yoki 2-taym?
- Birinchi.
- 3ta assist yoki bitta gol?
- Bitta gol.
- Kino yoki kitob?
- Ko‘proq kino ko‘raman.
- Ijtimoiy tarmoqlar yoki uyqu?
- Uyqu.
- Het-trik, ammo mag‘lubiyat yoki golsiz o‘yin va jamoa g‘alabasi?
- Jamoa g‘alabasi.
- Valeriy Karpin yoki Joze Mourino?
- Ikkalasini ham tanlasam…
- Murabbiy sifatida kimni tanlaysiz – Abraham yoki Shomurodov?
