Foto: Qashqadaryolik faollar Zoir Mirzayevga to‘n kiydirib, uni yangi lavozimga kuzatdi

Bugun, 18 noyabr kuni Qashqadaryo viloyati hokimligi majlislar zalida faollar yig‘ilishi bo‘lib o‘tdi. Unda prezident administratsiyasi rahbari Zaynilobiddin Nizomiddinov, shuningdek, viloyat hokimi o‘rinbosarlari, viloyat, shahar va tumanlar sektorlar rahbarlari, xalq deputatlari viloyat kengashi deputatlari, Senat a'zolari, viloyat boshqarma va tashkilotlari rahbarlari qatnashdi.

Yig‘ilishda tashkiliy masala ko‘rib chiqildi. Viloyat hokimi Zoyir Mirzayev boshqa ishga o‘tishi munosabati bilan vazifasidan ozod etildi.  Uning o‘rniga Murodjon Berdialiyevich Azimov Qashqadaryo viloyati hokimi vazifasini bajaruvchi etib tayinlandi.

Yig‘ilish so‘nggida Zoyir Mirzayev yangi lavozimga kuzatildi (u Toshkent viloyatiga hokim bo‘ladi).

Sobiq hokimni tantanali kuzatish marosimida viloyatning yangi hokimi Murodjon Azimov ham ishtirok etdi.

«Zoyir Mirzayev va faollar viloyatning yangi rahbari Murotjon Azimovga ham omadlar tiladi», deyiladi Qashqadaryo viloyati hokimligi xabarida.

Viloyat hokimligi axborot xizmati rahbari Ahror Sodiqov e'lon qilgan videodan ma'lum bo‘lishicha, sobiq hokimga uning maslahatchisi sifatida faoliyat yuritgan Yanvar Inoyatov to‘n kiydirib, faoliyatiga omad tilagan.

• Zoyir Mirzayev muqaddam Samarqand viloyati hokimi bo‘lgan, 2016 yildan qishloq va suv xo‘jaligi vaziri, 2018 yildan bosh vazir o‘rinbosari lavozimlarida faoliyat yuritgan. 2018 yil oktyabrida «Oqqo‘rg‘on voqeasi» sabab ishdan olinib, Jizzax viloyatining Sharof Rashidov tumaniga hokim etib tayinlangandi. U 2019 yilning oktyabridan buyon Qashqadaryo viloyati hokimi sifatida ishlab kelayotgandi.