Koronavirus: Avstriyada to‘liq lokdaun, bir yil davomida himoya qiladigan kokteyl

Pandemiyaning to‘rtinchi to‘lqini Germaniyani qamrab oldi. Yevropadagi yirik iqtisodiyot kasallanish yangi holatlari tufayli yuzaga kelgan favqulodda holatni e'lon qildi.

Germaniya rasmiylari koronavirus tufayli kasalxonalarga yotqizish ko‘rsatkichi yuqori bo‘lgan rayonlarda emlanmaganlar uchun cheklovlar joriy etishga qaror qilishdi. Bu Germaniyadagi 16ta o‘lkadan 12tasiga tegishli bo‘ladi.

Sog‘liqni saqlash vaziri Yyens Span odamlarni ijtimoiy kontaktlarni qisqartirishga chaqirib, vaksinaning o‘zi kasallanish holatlari sonining qisqarishiga olib kelmasligini ma'lum qildi. Germaniyada to‘liq lokdaun joriy etilishi haqidagi savolga vazir vaziyat shundayki, hech narsani istisno qilib bo‘lmaydi, deya javob qaytardi.

Iqtisodchilar Germaniyada yana bir lokdaun oldingi yilgi cheklovlardan keyin endigina tiklanishni boshlagan Yevropa iqtisodiyoti uchun juda yomon xabar bo‘lishi haqida ogohlantirdi.

Yyens Span Germaniya jonlantirish bo‘limidagi ish yuki hali eng yuqori cho‘qqiga chiqmagani, agar hech qanday chora ko‘rilmasa, vaziyat yomonlashishi mumkinligini ma'lum qildi. “Rojdestvo qanday bo‘lishini bilmayman. Bu faqat bizga bog‘liqligini ayta olaman, xolos”, — deya qo‘shimcha qildi u.

Polsha, Slovakiya, Niderlandiya va Chexiya: emlanmaganlar uchun lokdaunlar

Qisman lokdaunlar Slovakiya, Chexiya va Niderlandiyada ham joriy etilgan. Cheklovlar emlanmagan kishilarga tegishli. Yangi qoidalarga ko‘ra, emlanganlar yoki so‘nggi olti oyda koronavirus bo‘lganlik haqida ma'lumotnomaga ega kishilar qahvaxona, restoran va savdo markazlariga kirishlari mumkin. Vaksina olmaganlar faqat oziq-ovqat do‘konlariga kira olishadi. Agar ishxonaga borish zarur bo‘lsa, doimiy ravishda test qilish kerak.

Bu kabi qisman lokdaunlar bir necha hafta uchun joriy etilyapti va dushanba kuni amal qilishni boshlaydi.

Juma kuni pandemiya boshidan beri eng yuqori ko‘rsatkich — 11 mingdan ortiq yangi kasallanish holatlari aniqlangan Vengriyada sog‘liqni saqlash sohasining barcha xodimlari uchun majburiy buster emlanish joriy etilyapti.

Bundan tashqari, 29 noyabrdan boshlab bino ichkarisida ham niqob taqish yana majburiy bo‘lyapti.

Ukraina: emlanganlik to‘g‘risidagi sertifikat sotib olganlarga amnistiya

Ukrainada “kovid amnistiya” dasturi ishga tushirilmoqda. U qalbaki sertifikat sotib olib, davlat reyestrida vaksina olgan deya qayd etilganlarga haqiqiy privivkani olish va jarimadan qutulish imkonini beradi.

Bunday dastur hozircha Zakarpateda amal qilishni boshlaydi, biroq butun mamlakat bo‘ylab tarqatilishi mumkin.

Hozirda emlanganlik to‘g‘risidagi qalbaki sertifikatni sotib olganlik uchun jarima katta emas. 850 griven yoki taxminan 30 yevroga teng. Biroq Ukraina parlamenti jarima 20 marta oshirilishi va 600 yevro bo‘lishi haqidagi qonun loyihasini muhokama qilmoqda. Ukraina sog‘liqni saqlash vazirligi ma'lumotlariga ko‘ra, hozirda Ukrainada kamida 200 mingta emlanganlik to‘g‘risidagi qalbaki sertifikat sotib olingan.

AstraZeneca: antitanali kokteyl bir yil mobaynida himoya qiladi

AZD7442 yoki Evusheld deb nomlangan muolaja infeksiyadan 83 foiz himoya qiladi. Uning ta'siri esa bir yilgacha davom etishi mumkin, deya ma'lum qildi AstraZeneca kompaniyasi.

Evusheld bu – antitanalardan tayyorlangan kokteyl bo‘lib, vaksina olish man etilgan odamlar uchun muqobil variantga aylanishi mumkin.

AstraZeneca ma'lumotlariga ko‘ra, bunday kishilar dunyoda aholining 2 foizini tashkil etadi. Bunga dializdagilar, kimyoviy muolaja olayotgan saraton kasalligiga chalingan bemorlar, revmatoid artrit kabi holatlarda immunodepressant qabul qiluvchilar kiradi.

Ushbu preparat faqat bir marta, bir vaqtning o‘zida ikkita inʼeksiya bilan kiritiladi. Bundan tashqari, ilk belgilar paydo bo‘lgan vaqtdan boshlab uch kun ichida qilingan AZD7442 inʼeksiyasi kasallik og‘ir kechish xavfini 80 foizga pasaytiradi.

Antitana asosidagi muolaja hali sinov bosqichida, biroq olimlar u pandemiyaga qarshi kurashda yana bir qurol bo‘lishini aytmoqda.