07:27 / 29.11.2021
2526
Халқаро туризм 2023 йилдан аввал тикланмайди — БМТ

Кўплаб кечиктирилган талаблар туфайли саёҳатчиликнинг жонланишига 2022 йилнинг иккинчи ва учинчи чорагидан бошлаб гувоҳ бўлиш мумкин, дейишмоқда экспертлар.

Фото: nat-geo.ru

БМТ Бутунжаҳон туристик ташкилоти (UNWTO) бош котиби Зураб Пололикашвилининг фикрича, жаҳон туризми коронавирус пандемиясигача бўлган кўрсаткичларга 2023 йилдан аввал эришмайди.

Пололикашвилининг аниқлик киритишича, халқаро туризм бутун дунё бўйлаб миллиард саёҳатчига камайган ва 30 йил аввалги даражаларгача тушган. Лекин ташкилотдагилар некбин кайфиятга эга, чунки туризм соҳаси аллақачон тикланишни бошлаган.

«UNWTO экспертлар гуруҳи кўплаб кечиктирилган талаблар туфайли саёҳатчилик 2022 йилнинг иккинчи ва учинчи чорагидан бошлаб жонланишига доир ўта позитив кўтарилишни прогноз қилишмоқда. Айни пайтда биз Жанубий Европа, Марказий Америка ва Кариб ҳавзаси минтақаларида бироз кўтарилишга гувоҳ бўлмоқдамиз», — деди UNWTO бош котиби.

Унинг сўзларига кўра, экспертларнинг 45 фоизи жаҳон туризми 2019 йил даражасига 2024 йилда эришишига ишонади, бироқ уларнинг 43 фоизи бу кўрсаткич 2023 йилдаёқ қайд этилишидан умидвор.

«Суръатлар, вакциналарнинг тенг тақсимланиши ва саёҳатлар ва соғлиқни сақлаш тўғрисидаги протоколлар бўйича самарали ҳамкорлик туризм соҳаси муҳтож бўлган келишилган ҳаракатларни мувофиқлаштириш учун катта аҳамият касб этади», — дея таъкидлаган Пололикашвили.

Эслатиб ўтамиз. 2020 йил бутун статистикалар тарихида жаҳон туризми учун энг ёмон йил бўлди. Чегарани босиб ўтувчи туристлар сони 2019 йилга нисбатан 1 миллиардга камайган. 2019 йилда бу кўрсаткич 1,5 миллиард туристни ташкил этган эди.

Top