Turkiyada Fathulloh Gulen tashkilotiga aloqadorlikda gumonlanib 134 kishi qo‘lga olindi

Turkiyada politsiya tomonidan o‘tkazilgan maxsus operatsiya chog‘ida Fathulloh Gulenning FETO tashkilotiga aloqadorlikda gumonlanib 134 kishi qo‘lga olindi. Bu haqda TRT Haber telekanali xabar berdi.

Xabarda aytilishicha, operatsiya Istanbul va Anqarada o‘tkazilgan. Qo‘lga olinganlar orasida talabalar ham bor, deyiladi xabarda.

Gumonlanuvchilardan «ko‘p miqdorda tashkiliy va raqamli hujjatlar» musodara qilingan. Uch nafar gumonlanuvchi qochishga muvaffaq bo‘lgan.

Fathulloh Gulen – turk jamoat arbobi, yozuvchi va sobiq imom. O‘z chiqishlarida u xayriya va konfessiyalararo muloqotga urg‘u berib, islomning mo‘'tadil shaklini targ‘ib qiladi. 1999 yildan boshlab, AQShda ixtiyoriy surgunda yashab kelmoqda. 1970-yillarda Gulen g‘oyalari atrofida «Xizmat» harakati paydo bo‘lgan. Harakat dunyoning ko‘plab mamlakatlarida maktab va shifoxonalar ochadi.

Turkiyada gulenchilar avvaliga Rajab Toyyib Erdo‘g‘anni qo‘llab-quvvatlashgan. Biroq 2012 yilga kelib, ularning munosabatlari keskinlashdi. «Xizmat» Turkiyada terroristik tashkilot deb e'lon qilindi. Turkiya rasmiylari Gulenni 2016 yildagi harbiy to‘ntarish va Rossiya elchisi Andrey Karlovning o‘ldirilishiga aloqadorlikda ayblagan.

Avvalroq Fathulloh Gulen 16 noyabr kuni AQShda zaharlangani haqida xabar tarqalgandi. Ammo uning tarafdorlari va politsiya bu xabarni rad etdi.