Oʻzbekiston va Turkiya huquqni muhofaza qiluvchi organlari hamkorligida xalqaro qidiruvda boʻlgan S.A. Turkiya hududida aniqlanib, qoʻlga olindi.
Rasmiy maʼlumotga koʻra, u ajratilgan kredit mablagʻlarini oʻzlashtirish va rastrata qilish orqali talon-toroj qilib, davlat byudjetiga jami 5 mlrd soʻm zarar yetkazganlikda gumon qilinmoqda.
S.A. Oʻzbekiston Jinoyat kodeksining 167-moddasi 3-qismida nazarda tutilgan jinoyatni sodir etganlik gumoni bilan xalqaro qidiruvga berilgan edi.
Turkiyada qoʻlga olingan shaxs Oʻzbekistonga qaytarilib, tergov va boshqa protsessual harakatlarni davom ettirish uchun vakolatli organlarga topshirildi.
Qayd etilishicha, Oʻzbekiston va Turkiya huquqni muhofaza qiluvchi organlari oʻrtasida xalqaro qidiruvdagi shaxslarni aniqlash va ularning javobgarlikdan qochib yurishiga yoʻl qoʻymaslik boʻyicha hamkorlik davom etmoqda.
Gumonlanuvchining aybdor yoki aybsizligi sudning qonuniy kuchga kirgan hukmi bilan belgilanadi.
