Qoʻshimcha funksionallar
-
Tungi ko‘rinish
Marhamat tumani hokimi “Zukko kitobxon” tanlovi g‘olibiga ota-onasi bilan Dubayga sayohat yo‘llanmasini taqdim etadi
Andijon viloyati Marhamat tumani hokimi Bobirbek Yuldashev yoshlar orasida kitobxonlik madaniyatini oshirish maqsadida 15 yoshdan 30 yoshgacha bo‘lgan yoshlar o‘rtasida “Zukko kitobxon” tanlovini e'lon qildi.
Viloyat miqyosidagi mazkur tanlov uch bosqichda o‘tkazilib, ishtirokchi-kitobxonlar “O‘zbek adabiyoti bilimdoni”, “Jahon adabiyoti bilimdoni” va “Zukko kitobxon” shartlari bo‘yicha sinovdan o‘tishadi.
Tuman hokimi yoshlarni mazkur tanlov shartlari bilan tanishtirdi.
Bobirbek Yuldashevning ma'lumot berishicha, tanlovning final bosqichida 1-o‘rin sohibi bo‘lgan kitobxon ota-onasi bilan Dubay shahriga sayohat uchun yo‘llanmani, 2-o‘rin egasi ota-onasi bilan yurtimizning tarixiy va betakror shaharlari Samarqand, Buxoro, Xiva va Toshkent shahriga sayohat yo‘llanmasini qo‘lga kiritadi. 3-o‘rinni egallagan kitobxon maishiy texnikalar jamlanmasi bilan taqdirlanadi.
“Yurtimiz kelajagi bo‘lgan yoshlarga o‘z ustida ishlab, kitob mutolaa qilib, ota-onasini dunyoning eng go‘zal shaharlaridan biriga, mamlakatimizning qadimiy shaharlariga olib borish imkoniyatini beryapmiz. O‘tgan yili ham viloyatimiz hokimi Shuhratbek Abdurahmonov tashabbusi bilan mana shunday tanlov o‘tkazganmiz. Yoshlarda qiziqish juda katta bo‘ldi. Bu yil sovrinni o‘zgacha qildik. Maqsadimiz, kelajak avlod vakillarini kitob o‘qishga targ‘ib qilish”, deydi Marhamat tumani hokimi.
Marhamat tumani hokimligi matbuot xizmati Ⓣ
