Qashqadaryo hokimi viloyatdan boshqa hududlarga chigit olib chiqishni taqiqladi

Qashqadaryo viloyati hokimi tomonidan O‘zbekistonning boshqa hududlariga chigit olib chiqishga taqiq qo‘yilgan. Bu haqda Kattaqo‘rg‘on shahar hokimi, senator Gavhar Alimova ma’lum qilmoqda.

Bugun, 2021 yil 3 yanvar kuni Kattaqo‘rg‘on shahar hokimligi axborot xizmati senator Gavhar Alimovaning maqolasini e’lon qildi. Unda senator Kattaqo‘rg‘on shahrida joylashgan yog‘-moy mahsulotlari ishlab chiqarishga ixtisoslashgan korxona Qashqadaryodan sotib olgan chigitni viloyat hududidan olib chiqolmaganini ma’lum qilgan.

Maqolada yozilishicha, 2021 yil 28 dekabr kuni Kattaqo‘rg‘on shahrida joylashgan “Marokand gold oil extraksiya” MChJ rahbari S.Ro‘ziyev shahar hokimiyatiga kelib, Respublika tovar va xomashyo birjasidan ochiq savdolar asosida sotib olingan 100 tonna chigit mahsuloti Qashqadaryodan Samarqandga kirish chegarasida YPX xodimlari tomonidan Qashqadaryo viloyat hokimi birinchi o‘rinbosari Nodir Erkayevning topshirig‘i asosida ushlab turilganini aytgan.

Shundan so‘ng senator Nodir Erkayev bilan telefon orqali bog‘langan. Nodir Erkayev chigitlarni faqat viloyat hokimi ruxsat bersa qo‘yvorishini, aks holda buning iloji yo‘qligini aytgan.

“Shundan so‘ng viloyat hokimi Muratjon Berdialiyevichning telefon raqamini qiyinchilik bilan topib vaziyatni tushuntirdim va chigitni qo‘yib yuborishini iltimos qildim. Viloyatning yangi hokimi esa “... masalani o‘rganib chiqib ma’lum qilaman”, dedi. Men umid bilan barcha tegishli hujjatlarni hokimning telegramiga tashlab berdim. Javob bo‘lmagandan so‘ng telegramiga va qo‘l telefoniga SMS’lar yozdim, afsuski hech qanday javob olishning iloji bo‘lmadi”, deb yozadi Gavhar Alimova.

Uning ta’kidlashicha, oradan 3 kun o‘tib 2 yanvar kuni Qashqadaryodan tadbirkorga telefon bo‘lgan va Farhod va Jahongir deb o‘zini tanishtirgan YPX xodimlari chegaradan yuk ortilgan mashinalarini olib ketishini so‘rashgan. Ammo oradan biroz o‘tib chigit ortilgan mashinalarni yana qo‘yib yuborishmagan. Buni viloyat hokimining birinchi o‘rinbosari Nodir Erkayev ruxsat bermagani bilan izohlashgan.

“Shundan so‘ng men yana janob Nodir Xudoyberdiyevichga qo‘ng‘iroq qilganimda “...hozirgina viloyat hokimi bilan gaplashdim, chigitni qo‘yib yuborishga hech qanday ruxsat yo‘q” deb aytdi. “Opajon, ming afsus, men yuk mashinalarini qo‘yib yubora olmayman”, dedi. Men 100 tonna chigitni olib o‘tish uchun 4 kun sarson bo‘ldim. Achinarlisi, murojaatimga va yozgan SMS’larimga viloyat hokimi “ha” yoki “yo‘q” deb javob berishi shunchalik ham qiyin bo‘ldimi?! Yangi yil bayrami tadbirkorga, haydovchilarga va menga ham afsuski tatimadi. Axir bitta shahar hokimi 100 tonna chigitni o‘tkazish uchun 4 kun bezovta bo‘lishini qanday izohlash mumkin? Men shaxsiy manfaatim uchun jon kuydirayotganim yo‘q-ku!.. Men bu murojaatimga umid bilan javob kutaman”, deydi senator.

Kun.uz hodisa yuzasidan izoh olish maqsadida Qashqadaryo viloyati hokimligi axborot xizmati bilan bog‘lanishga urindi, ammo buning iloji bo‘lmadi.

Eslatib o‘tamiz, 2020 yil noyabr oyida Qashqadaryo, Surxondaryo va Xorazm viloyati hokimlari o‘z hududlaridan chigitni olib chiqib ketishni taqiqlashgan. Shundan so‘ng Monopoliyaga qarshi kurash qo‘mitasi chigitni boshqa viloyatga olib chiqishni taqiqlash qonunga zid ekanini aytib, Qashqadaryo, Surxondaryo va Xorazm viloyat hokimliklari hamda ushbu viloyatlar Ichki ishlar boshqarmalariga nisbatan tegishli ish qo‘zg‘atilganini ma’lum qilgandi.