Qozog‘istonda gaz narxi oshishiga qarshi norozilik namoyishlari bo‘lib o‘tdi

Qozog‘iston prezidenti Qosim-Jo‘mart To‘qayev respublika hukumatiga «Janao‘zandagi vaziyatni zudlik bilan ko‘rib chiqish» bo‘yicha topshiriq berganini ma’lum qildi.

Foto: Tengrinews.kz.

Qozog‘istonning Mang‘istau oblastida suyultirilgan gaz narxi keskin ko‘tarilishiga qarshi norozilik namoyishlari bo‘lib o‘tdi, deb xabar berdi Tengrinews.

Xabarga ko‘ra, 2 yanvar kuni Janao‘zan shahri aholisi miting o‘tkazgan. Avtomobilchilar bir litr gaz narxi 120 tengega ko‘tarilganidan norozilik bildirgan va hukumatdan narxni ikki baravarga kamaytirishni talab qilgan.

3 yanvar kuni Qozog‘iston prezidenti Qosim-Jo‘mart To‘qayev respublika hukumatiga «Janao‘zandagi vaziyatni zudlik bilan ko‘rib chiqish» bo‘yicha topshiriq berganini ma’lum qildi.

O‘z navbatida, vazirlar mahkamasi Mang‘istau oblastidagi ijtimoiy-iqtisodiy vaziyatni ko‘rib chiqish bo‘yicha komissiya tuzilganini e’lon qildi va gaz narxini barqarorlashtirish bo‘yicha chora-tadbirlar amalga oshirilishini bildirdi.

Mang‘istau oblastidagi noroziliklar fonida respublikaning yirik shaharlarida xavfsizlik choralari kuchaytirilgani aytilmoqda.

«Interfaks»ning yozishicha, xususan, Olmaotada markaziy maydon politsiya tomonidan o‘rab olingan.

Tayyorlagan Дилшод Аскаров

#gaz #Qozog‘iston

2 yanvar kuni Qozog‘istonning Mang‘istau oblastida suyultirilgan gaz narxi ikki baravarga ko‘tarilganidan norozi bo‘lgan qozog‘istonliklar ommaviy mitingga chiqishdi va keyingi kunlarda namoyishlar butun mamlakat bo‘ylab yoyildi.