Yelizaveta II shahzoda Endryuni tajovuzkorlikda ayblagan fondga 2,7 mln dollar beradi

Buyuk Britaniya qirolichasi Yelizaveta II uning o‘g‘li Endryuni nomusga tajovuz qilishda ayblagan amerikalik faol va huquq himoyachisi Virjiniya Juffrening xayriya fondiga 2 mln funt sterling o‘tkazishga qaror qildi. Bu haqda Mirror gazetasi xabar berdi.

Ma’lum qilinishicha, shahzoda Endryu huquq himoyachisi bilan kelishuvga erishgan. U aybini tan olmagan, ammo Juffrening jinsiy qullik va tajovuzdan jabrlanganlarga yordam beruvchi fondiga "katta miqdorda xayriya" qilishga va’da bergan.

Virjiniya Juffre shahzoda Endryuni zo‘ravonlikda ayblamoqda. Uning ta’kidlashicha, qirolichaning o‘g‘li yuqori martabali shaxslarning shahvoniy maqsadlari uchun o‘smirlarni yetkazib berish bilan shug‘ullangan biznesmen Jyeffri Epshteynning xizmatlaridan foydalangan.

Shahzoda Epshteyn bilan do‘st bo‘lganini rad etmagan, ammo o‘zining aybsizligini aytib kelmoqda.