16:01 / 03.03.2022
9563
«Андижонқудуқтаъмирлаш» жамияти – 70 йиллик тажриба билан ишга замонавий ёндашув

“Андижонқудуқтаъмирлаш” жамияти 1952 йилда Андижон вилояти Марҳамат тумани Полвонтош шаҳарчасида ташкил этилган. 

“Андижонқудуқтаъмирлаш” жамияти 1952 йилда Марҳамат тумани Полвонтош шаҳарчасида ташкил этилган. 70 йиллик тажрибага эга бўлган корхона 20 миллион АҚШ доллар миқдорида инвестиция киритган янги таъсисчи билан Фарғона водийси, Қашқадарё ва Сурхондарё вилоятларидаги мавжуд нефть ва газ конларида қудуқларни тўла ва жорий таъмирлаш ишларини амалга ошириб келмоқда.

Корхона туғилган кунида республика етакчи журналист ва блогерлари, жамоатчилик вакиллари учун пресс-тур ташкил қилди. Тадбир иштирокчилари “Андижонқудуқтаъмирлаш” МЧЖ фаолияти билан иш жараёнларида бевосита иштирок этиб, яқиндан танишди.

Ўзбекистон президентининг 2019 йил 9 июлдаги ПҚ-4388-сон қарорига асосан “Ўзбекнефтгаз” миллий ҳолдинг компанияси тасарруфига кирувчи сервис ташкилотлар устав капиталидаги улушлари Давлат активларини бошқариш агентлигига ўтказилди.

2020 йил 1 октябрда жамият устав капиталидаги давлат улушлари инвестор Даврон Сулаймонов томонидан сотиб олинди. Жамиятнинг ишлаб чиқариш-иқтисодий фаолиятини яхшилаш мақсадида зарур чора-тадбирлар белгиланди.

Корхона моддий техника базасини қайта модернизация қилиш мақсадида инвестор томонидан киритилган катта сармоя ҳисобига махсус техника, тўла ва жорий таъмирлаш жараёнида зарур бўладиган замонавий асбоб-ускуналар, жиҳозлар, жумладан бурғилаш қувурлари сотиб олинди.

“Иш бошлаганимиздан буён корхонага 20 миллион АҚШ доллари миқдорида инвестиция киритдик. Иккита бригада билан фаолият юритаётган жамиятда мана ҳозир 12 та бригада шаклланди. Ишчи-ходимлар сони 132 нафардан 560 нафарга етди. Хитой ва Россиядан замон талабидаги қудуқларни капитал-таъмирлаш станокларини олиб келдик.

Айни пайтда “Андижонқудуқтаъмирлаш” жамияти бурғилаш ва таъмирлаш соҳасида 30 га яқин замонавий махсус техникага, 20 дан ортиқ таъмирлаш ускуналарига эга. Ишчи-ходимларнинг вахта режимида ишлаши учун барча шароитлар яратиб берилган”, дейди Даврон Сулаймонов.

Корхонанинг бугунги кундаги салоҳияти ҳамда нефть ва газ соҳасидаги кўп йиллик тажрибасига асосланиб, бригадаларнинг моддий-техника базаси замон талаби даражасидаги асбоб-ускуна ва жиҳозлар билан тўлдирилган.

Корхона “Ўзбекнефтгаз” АЖ таркибига кирувчи “Водий нефт ва газ қазиб чиқариш” ва “Муборак нефт ва газ қазиб чиқариш” бошқармаси, “ANDIJANPETRO” МЧЖ қўшма корхонаси, “SANOAT ENERGETIKA GURUHI” МЧЖ” хорижий корхонаси билан ҳамкорликда иш олиб бормоқда ва конларда қудуқларни жорий ҳамда тўла таъмирлаш ишлари билан бир қаторда, ёлланма 2-ўзанни телеметрия хамда телеметриясиз бурғилаш, қидирув-бурғилаш ишларини олиб боришни ҳам йўлга қўйди.

“Фаолият бошлаганимиздан бери Муборак ҳудудида 23 та қудуқни кавлаб фондга қайтарган бўлсак, водий ҳудудида 86 та қудуқ иши қайта тикланди”, дейди Даврон Сулаймонов. 

“Ўзбекнефтгаз“ АЖ “Андижонқудуқтаъмирлаш” МЧЖ билан нефт-газ конлари қудуқларини таъмирлаш ҳажмларини кенгайтириш ва бошқа масалалар бўйича ҳамкорлик ишларини йўлга қўйган ҳамда бугунги кунда самарали натижаларга эришмоқда.

“Мақсадимиз - Ўзбекистон иқтисодиётида етакчи ўринни эгаллаб келаётган нефт-газ саноатини ривожлантиришга ўз ҳиссамизни қўшиш”, дейди “Андижонқудуқтаъмирлаш” жамияти таъсисчиси Даврон Сулаймонов

ОАВ вакиллари “Андижонқудуқтаъмирлаш” АЖ мутахассислари томонидан капитал таъмирлаш ишлари олиб борилаётган “Ўзбекнефтгаз” АЖнинг “Водий нефт ва газ қазиб чиқариш” бошқармасига қарашли иккита қудуқда бўлди.

“Чақар” конининг 4-сонли қудуғида капитал таъмирлаш ишлари олиб борилган. Ушбу қудуқнинг 2070–2143 метр оралиқларидаги (очиқ ўзанда) қатламдан келган қумдан (қум тиқинидан) тозаланиб, қудуққа филтр туширилди. Ўзлаштириш натижасида қудуқдан кунлик 150 минг куб метр саноат миқёсида табиий газ ва 8 тонна газ конденсати қазиб чиқарилишига эришилди.

Пресс тур якунида 70 йиллик юбилейини нишонлаётган корхона томонидан тантанали тадбир уюштирилиб, фахрий ходимларга эътибор кўрсатилди.

Элмурод Эрматов ва Азизбек Исмоилов тайёрлади

Top