DW nashrining AFP agentligiga tayanib xabar berishicha, Fransiya ichki ishlar vaziri Loran Nunes 30-sentabr kuni namoyishlar 356 ta maktabni qamrab olganini maʼlum qilgan. Bir kun avval ularning soni 338 ta boʻlgan.
Noroziliklar boshlanganidan buyon 625 kishi ushlangan. Toʻqnashuvlarda 83 nafar politsiya va jandarmeriya xodimi jarohatlangan.
Fransiya Taʼlim vazirligi maʼlumotlariga koʻra, oʻtgan haftadan buyon 119 nafar oʻquvchi va 34 nafar maktab xodimi ham jabrlangan. Vazir Eduar Jeffre vaziyatni «taʼlim sohasida misli koʻrilmagan holat» deb atagan.
Namoyishlar dastlab Parij va uning atrofini qamrab oluvchi Il-de-Frans hududida boshlangan, keyin esa mamlakat boʻylab tarqalgan.
Yuqori sinf oʻquvchilari sinflarda bolalar soni haddan tashqari koʻpligi, pedagoglar yetishmasligi, taʼlim muassasalarining yomon ahvoli hamda, ularning fikricha, dars jadvali oʻta tigʻizligidan norozi.
Ayrim yirik shaharlarda namoyishlar politsiya bilan toʻqnashuvlarga aylangan. Baʼzi holatlarda namoyishchilar tosh va yonuvchi aralashma solingan shishalardan foydalangan. Politsiya esa koʻzdan yosh oqizuvchi gaz qoʻllagan.
Fransiya prezidenti Emmanuel Makron koʻplab yoshlarning «xavotiri va gʻazabini» tushunishini bildirgan. Biroq u bu muammolarning hech biri zoʻravonlikni oqlamasligini taʼkidlagan.
Hukumat oʻquvchilar oʻz xavotirlari va talablarini bildirishi uchun muloqot platformasini tashkil etishini eʼlon qilgan. U 6-oktabrdan kechikmay ishga tushishi kerak. Shundan soʻng rasmiylar vaziyatni umummilliy miqyosda tahlil qilishni rejalashtirmoqda.
«Qanday boʻlmasin, oʻquvchilarimizning darslarga qaytishiga erishishimiz kerak», - degan taʼlim vaziri.
AFP qayd etishicha, soʻl populistik «Boʻysunmas Fransiya» partiyasi oʻquvchilarning norozilik harakatini qoʻllab-quvvatlamoqda. Partiya yetakchisi Jan-Lyuk Melanshon oʻz siyosiy kuchi zoʻravonliksiz namoyishlarga chaqirayotganini bildirgan.
