Nurafshonda ichki ishlar mansabdorlari o‘qotar qurolni yig‘a olmadi

O‘zini Nurafshon shahar IIB huzuridagi Tergov bo‘linmasi boshlig‘i Mirali Abdurahmonov deb tanishtirgan xodim qismlarga ajratilgan AK-74 o‘qotar qurolini yig‘a olmagani ko‘rinadi.

Holatni videotasvirga olib turgan noma’lum shaxs topshiriq bajarilmagach, mas’ullardan kadrlar masalalari bo‘yicha rahbar o‘rinbosarini chaqirtirishni, xodimlarning o‘qotish hamda jangovar shaylik sinovlaridagi natijalari qayd etilgan jurnallarni olib kelishni talab qiladi. Bunga javoban kimdir ushbu hujjatlar Toshkent viloyati IIBBda saqlanishini aytgani eshitiladi.

Boshqa bir videoda Nurafshon shahar IIB boshlig‘ining birinchi o‘rinbosari ekani aytilgan erkakning qurolni yig‘a olmagani aks etgan.

Kun.uz muxbiri holat bo‘yicha izoh olish uchun Nurafshon shahar IIB boshlig‘ining shaxsiy tarkib bo‘yicha o‘rinbosari Sardor Ortiqov hamda boshliqning xizmat bo‘yicha o‘rinbosari Elyor Elomonovlarga qo‘ng‘iroq qildi. Sardor Ortiqov muxbirning savollarini eshitgach, boshqa joyga tushib qolganini aytib telefonni qo‘yib qo‘ygan bo‘lsa, Elyor Elomonov internetda tarqalgan video bo‘yicha ma’lumot bera olmasligini aytib, Toshkent viloyati IIBB axborot xizmatiga murojaat qilishni tavsiya qildi.

Toshkent viloyati IIBB boshlig‘ining matbuot kotibi Bobur To‘laganov viloyatdagi ichki ishlar organlari tizimida xizmat qilayotgan barcha xodimlarning jismoniy va jangovor tayyorgarligi sinovdan o‘tkazilayotganini tasdiqladi. Uning aytishicha, ushbu sinovlar viloyat IIBBning tegishli xizmatlari tomonidan o‘tkazilgan.

“Toshkent viloyati bo‘yicha ichki ishlar organlari xodimlarining jismoniy va jangovar tayyorgarligi sinovdan o‘tkazilmoqda. Xodimlarning o‘q otish, qurolni noto‘liq qismlarga sochish va yig‘ish, jismoniy holati, sohaga oid bilimlari tekshirilmoqda. O‘zimiz ham bu sinovlarda qatnashdik.

Sinovdan o‘tolmagan xodimlar sinovni qaytadan topshiradi. Masalan, nazariy bilimlar bo‘yicha testdan o‘tolmaganlar test sinovini, qismlarga ajratilgan qurolni yig‘olmaganlar shu sinovni qaytadan topshirishadi. Agar yana o‘tolmaydigan bo‘lishsa, kerak bo‘lsa malaka oshirishga borib qaytadan o‘qiydi. Hech kim sinovdan o‘tolmagani uchun vazifasidan chetlashtirilmaydi.

Internetda tarqalgan videoga keladigan bo‘lsak, Nurafshon shahar IIB huzuridagi Tergov bo‘linmasi boshlig‘i ikkinchi urinishda avtomatni yig‘a olgan. Bu jarayon aks etgan video bor”, – deya Bobur To‘laganovning so‘zlarini keltirmoqda Kun.uz muxbiri.