Agrar sohada xalqaro moliya institutlari hisobidan 400 mln dollarlik loyihalar ishga tushiriladi

Prezident “O‘zbekiston qishloq xo‘jaligini rivojlantirishning 2020-2030 yillarga mo‘ljallangan strategiyasida belgilangan vazifalar ijrosini samarali tashkil etishga doir qo‘shimcha chora-tadbirlar to‘g‘risida”gi qarorni imzoladi.

Qulay agrobiznes muhitini va qo‘shilgan qiymat zanjirini yaratish yo‘nalishida joriy yil yakuniga qadar xalqaro moliya institutlari mablag‘lari hisobidan agrar sohada umumiy qiymati 400 million AQSh dollarigacha bo‘lgan miqdordagi investitsiya loyihalari ishga tushiriladi.

Har bir hududda kamida bittadan agrologistika markazlari barpo etiladi. Mazkur markazlarda xalqaro bozorlarda tan olingan sifat sertifikatlarini olish imkoniyati yaratiladi.

Qishloq xo‘jaligi vazirligi Qoraqalpog‘iston Respublikasi Vazirlar Kengashi va viloyatlar hokimliklari bilan birgalikda loyihalarni shakllantirish, tashabbuskorlarni aniqlash va ularni o‘z vaqtida ishga tushirish choralarini ko‘radi.