Bu choralar prezidentning 2026-yil 28-sentabrdagi «Agrar sohada moliyaviy qoʻllab-quvvatlash samaradorligini oshirish va tavakkalchiliklarni boshqarish tizimini takomillashtirish chora-tadbirlari toʻgʻrisida»gi PQ–354-son qarorida nazarda tutilgan.
Qarorga koʻra, 2026-yil hosilida paxta xomashyosining har bir tonnasi uchun 500 ming soʻmdan subsidiya beriladi. Bunda 4 va 5-navli paxtaga subsidiya ajratilmaydi.
Paxta-toʻqimachilik klasterlari va ular taʼsischi boʻlgan korxonalarga 2026-yilda oʻziga biriktirilgan maydonlarda paxta yetishtirilgan har bir gektar uchun 1,5 million soʻmdan ajratiladi.
2027–2029-yillarda chorvachilik xoʻjaliklariga asosiy maydonlarda ozuqa ekinlari yetishtirgani uchun har gektarga yiliga 500 ming soʻmdan subsidiya beriladi. Mablagʻ Kosmik tadqiqotlar va texnologiyalar agentligi xulosasi asosida ajratiladi.
Shuningdek, 2026-yil 1-oktabrdan 2027-yil 1-iyunga qadar tadbirkorlarga sovitilgan mol va qoʻy goʻshtini import qilishda har kilogramm uchun 2,5 ming soʻmdan subsidiya toʻlanadi.
2027-yil 1-yanvardan 2028-yil 1-yanvarga qadar huquqiy tajriba tariqasida «Natijaviy subsidiya» tizimi joriy etiladi. U qishloq xoʻjaligi mahsulotlari yetishtiruvchilarning suvni tejaydigan sugʻorish texnologiyalarini joriy etish xarajatlarining bir qismini qoplashga tatbiq qilinadi.
Bunda subsidiya miqdori faqat xarajatlarga emas, balki hosildorlik, mahsulot sifati va boshqa natija koʻrsatkichlariga ham qarab belgilanadi.
Qarorda agrar sohadagi sugʻurta boʻyicha ham choralar nazarda tutilgan. Uch yil davomida sugʻurta hodisasi kuzatilmagan qishloq xoʻjaligi korxonalariga toʻrtinchi yildan boshlab sugʻurta mukofotiga 10 foizdan 20 foizgacha chegirma beriladi.
Sugʻurta mukofotlarining 3–5 foizi esa ogohlantiruvchi tadbirlar zaxirasiga yoʻnaltiriladi.
