08:15 / 10.08.2022
4843
«Укртранснафта» РФдан «Дружба» орқали нефть транзитини тўхтатди

Россия нефтини Украина ҳудуди орқали олиб ўтилишининг тўхтатилишига «Транснефт» томонидан санкциялар доирасидаги транзит хизматлари учун тўлов билан боғлиқ муаммолар сабаб бўлди.

Фото: Reuters

4 августдан бошлаб Украинанинг «Укртранснафта» компанияси «Дружба» нефть қувурининг жанубий тармоғи орқали Россия нефтини олиб ўтишни тўхтатди, деб хабар берди Россиянинг «Транснефт» компанияси 9 август, сешанба куни. Бунинг сабаби, Россияга қарши санкциялар туфайли юзага келган транзит хизматлари учун тўлов билан боғлиқ муаммолар бўлди: 2022 йил 22 июлда жорий йилнинг август ойида Россия нефтини Украина орқали транзит қилиш учун тўлов амалга оширилаётганда, маблағлар 2022 йил 28 июлда «Транснефт» ҳисобига қайтарилди. 

«Вазият Европа регуляторлари турли юрисдикциялардаги банклар учун ҳаракатлар алгоритм бўйича ҳалигача ягона позицияни шакллантирмагани ва ушбу рухсатномаларни бериш тартибини ишлаб чиқмаганлиги билан мураккаблашди», - дея таъкидлади «Транснефт» вакиллари. 

Венгрия, Словакия ва Чехия «Дружба»нинг жанубий тармоғи бўйлаб Россиядан нефть билан таъминланади. Украина ҳудуди орқали транзит хизматлари «Транснефт» ва «Укртранснафта» ўртасидаги шартномага мувофиқ олдиндан тўлов асосида амалга оширилади.

Россия компаниясининг пресс-релизида таъкидланишича, транзит учун тўлов масаласини ҳал қилиш учун «Транснефт» ваколатли банкка шартнома бўйича «Укртранснафта» билан ҳисоб-китобларни амалга оширишга рухсат олиш учун тегишли маълумотни кейинчалик Европа регуляторига тақдим этиши мақсадида мурожаат юборди. Бундан ташқари, томонлар «маблағларни ўтказишнинг муқобил вариантлари»ни муҳокама қилмоқда.

Ўз навбатида, Словакиянинг Slovnaft НҚЗ вакили 9 август куни «Дружба» қувури орқали бир неча кундан бери маҳсулот етказиб берилмаётганини тасдиқлади. Бироқ, унинг сўзларига кўра, Братиславадаги НҚЗ ишлашда давом этмоқда. Slovnaft Россия ва Украина билан музокаралар олиб бормоқда ва Венгриянинг MOL НҚЗ билан биргаликда транзит харажатларини ўз зиммасига олишга тайёр, дея қўшимча қилди у. 

Айни пайтда, Россия нефтини «Дружба» нефть қувурининг шимолий тармоғи орқали - Беларусдан Полша ва Германия йўналиши бўйича етказиб бериш одатдагидек амалга оширилмоқда. 

2021 йилда «Дружба» орқали Украина ҳудудидан 12 миллион тонна Россия нефти, жумладан, Чехияга 3,4 миллион тонна, Словакияга 5,2 миллион тонна ва Венгрияга 3,4 миллион тонна олиб ўтилди. 

Top