Европа ташқи ҳаракатлар хизмати Россиянинг Украинага берган зарбалари оқибатида тинч аҳоли орасида қурбонлар бўлгани ва дипломатик объектларга зарар етгани муносабати билан Москва вакилига норозилик нотасини топширишни режалаштирмоқда.
Бу ҳақда 24 июл куни ЕИ ташқи ишлар ва хавфсизлик сиёсати бўйича олий вакили Кая Каллас X ижтимоий тармоғида маълум қилди.
Калласнинг таъкидлашича, Россиянинг Киев ва Украинанинг бошқа ҳудудларига зарбалари тасодифий эмас, балки «мақсадли сиёсат» натижасидир.
24 июл куни берилган зарбалардан бири Славянск шаҳридаги Латвиянинг фахрий консуллигига ҳам тўғри келган. Каллас бу ҳолатни Москванинг халқаро ҳуқуқ нормаларига муносабати билан боғлаб танқид қилди.
«Бунга жавобан бугунги зарбалар муносабати билан Россиянинг ЕИдаги вакилини чақиртирамиз. Шунингдек, санкциялар рўйхатини кенгайтириб, унга Россия ҳарбий-саноат мажмуасининг қўшимча корхона ва тузилмаларини киритишни таклиф қиламан», — деди Каллас.
Киев яқинидаги полигонга зарба: камида 10 киши ҳалок бўлди
24 июл куни эрталаб Россия қўшинлари Киев вилоятига баллистик ракеталар билан ҳужум қилди. Украина мониторинг каналлари зарбада «Циркон» ракеталаридан фойдаланилганини хабар қилган.
Кейинчалик ҳужум нишонларидан бири Буча туманидаги хусусий полигон бўлгани маълум қилинди. У ерда қурол-яроғ, жумладан, учувчисиз учиш аппаратлари кўргазмаси ўтказилаётган эди.
Украина бош прокурори Руслан Кравченконинг маълум қилишича, полигонга берилган зарба оқибатида 10 киши ҳалок бўлган, яна 100 нафарга яқин одам жароҳатланган.
Унинг сўзларига кўра, айни пайтда тадбирни лозим даражада ташкил этмаслик ва ўтказиш ҳолати юзасидан тергов олиб борилмоқда.
Россия Мудофаа вазирлиги полигонга зарба берилганини тасдиқлаган. Россия томонининг даъво қилишича, ҳужум вақтида объектда Украинадаги етакчи дрон ишлаб чиқувчилар ва ишлаб чиқарувчилар, Украина Қуролли кучларининг учувчисиз тизимлар бўлинмалари қўмондонлиги ва махсус хизматлар вакиллари бўлган.
Москва уларни Россия ҳудудига зарбаларни режалаштириш ва амалга оширишга алоқадор шахслар сифатида кўрсатган.
Зеленский янада узоқ масофали дронлар яратилишини айтди
Шу куни Украина президенти Владимир Зеленский мамлакат 2027 йилда 10 минг километргача масофага уча оладиган дронларга эга бўлишини маълум қилди.
Унинг сўзларига кўра, ҳозирнинг ўзида Украинада 3 минг километрдан ортиқ масофадаги нишонларга етиб бора оладиган учувчисиз аппаратлар мавжуд. Зеленский Россия ҳам шундай имкониятга эга дронларга эгалигини айтган.
Украина президенти, шунингдек, Киев АҚШ билан дронлар ишлаб чиқариш бўйича келишув тузишни ва Америка ҳудудида тегишли ишлаб чиқариш қувватларини ташкил этишни режалаштираётганини маълум қилди.
Зеленскийнинг таъкидлашича, дрон технологиялари жанг майдонида жуда тез — ҳар уч-олти ойда ўзгариб бораётгани сабабли уларни доимий равишда такомиллаштириш ва янги ишлаб чиқариш линияларини йўлга қўйиш зарур.
Аввалроқ Зеленский Украина Қуролли кучлари таркибида Россия ҳудудидаги узоқ масофада жойлашган объектларга таъсир кўрсатишга ихтисослашган махсус қўмондонлик ташкил этиш бўйича топшириқ берган эди.
