Kanadada pichoq bilan qilingan hujumlar oqibatida 10 kishi halok bo‘ldi

4 sentabr, yakshanba kuni Kanadaning markaziy qismidagi Saskachevan provinsiyasida sodir etilgan hujumlar oqibatida kamida 10 kishi halok bo‘ldi, yana 15 kishi pichoqlandi, deb xabar berdi mahalliy politsiya.

Kanada qirollik Saskachevan otliq politsiyasi boshlig‘i Ronda Blekmor matbuot anjumanida hujum qilganlarning qurbonlari 13 xil joyda, shu jumladan Shimoliy Amerika mamlakatining Jyeyms-Smit-Kri-Neyshn tub aholi yashaydigan hududda va Veldon qishlog‘ida topilganini aytdi. Ulardan ba’zilari ataylab o‘ldirilgan, boshqalari esa tasodifiy qurbonlar bo‘lgan deb hisoblanyapti.

Politsiya Demiyen Sanderson va Maylz Sanderson ismli ikki gumonlanuvchini qidiruvga bergan. Politsiya ma’lumotlariga ko‘ra, ular qora Nissan Rogue mashinasida yuribdi. Oxirgi marta ularni hujum joyidan 320 kilometr janubda joylashgan Rejayna shahrida ko‘rishgan. 

Mahalliy hokimiyat Saskachevan aholisini xavfsiz joylarda qolishga va ularni tark etmaslikka chaqirdi. Jyeyms-Smit-Kri-Neyshn rezervatsiyasida favqulodda holat e’lon qilindi. 

Kanada bosh vaziri Jastin Tryudo hujumlarni «dahshatli va yurakni ezuvchi» deb atadi. «Men yaqinini yo‘qotganlar va jarohat olganlar haqida o‘ylayapman», — deb yozdi u Twitter’dagi sahifasida va hukumat vaziyatni diqqat bilan kuzatib borayotganini qo‘shimcha qildi.