15:41 / 15.09.2022
11295
Шавкат Мирзиёев ва Имомали Раҳмон Явон ГЭСни қуриш масаласини кўриб чиқди

Ўзбекистон президенти Шавкат Мирзиёев 15 сентябр куни Тожикистон президенти Имомали Раҳмон билан музокара ўтказди.

Фото: Президент матбуот хизмати

Суҳбат аввалида Тожикистон етакчиси Ўзбекистоннинг Шанҳай ҳамкорлик ташкилотидаги раислигини юқори баҳолади ва президент раҳбарлигида Самарқандда рўй берган янгиланишларни алоҳида қайд этди.

Самарқанд саммити якунлари ШҲТ доирасидаги кўп томонлама ҳамкорликни янада мустаҳкамлаши ва ташкилот халқаро нуфузини юксалтириши таъкидланди.

Президентлар биродар мамлакатлар ўртасидаги дўстлик ва яхши қўшничилик, стратегик шериклик ва иттифоқчилик муносабатлари изчил кенгайиб, мустаҳкамланаётганини қайд этди. Жорий йил бошидан ўзаро савдо ҳажми 16 фоизга ошди. Иқтисодиёт турли тармоқларида, жумладан электротехника, қишлоқ ва сув хўжалиги, транспорт ва бошқа соҳаларда қўшма кооперация лойиҳалари амалга оширилмоқда.

Давлат раҳбарлари мамлакатлар ва бутун минтақа манфаатларига жавоб берувчи лойиҳа - Явон ГЭСни барпо этиш бўйича ишлар бошлангани муҳим аҳамият касб этишини қайд этди.

Ўзбекистон ва Тожикистон етакчилари долзарб халқаро ва минтақавий масалалар юзасидан ҳам фикр алмашди.

Мавзу
Самарқандда ШҲТ саммити
15–16 сентябр кунлари Самарқанд шаҳрида Шанҳай ҳамкорлик ташкилотининг навбатдаги саммити ташкиллаштирилади.
Барчаси
Top