O‘zbekiston ShHT bo‘yicha sheriklarga Samarqand birdamligi tashabbusini taqdim etadi

“Samarqand – biz ShHTni tuzishda asos qilib olgan bag‘rikenglik va turli xalqlarning an’ana va qadriyatlariga hurmat tamoyillari asrlar davomida hayotga tatbiq etilgan jonli namunadir”, dedi Shavkat Mirziyoyev.

Hozirgi kunda geosiyosiy raqobat, mafkuraviy ziddiyat va bahslardan xoli bo‘lgan bunday muloqot favqulodda zarurligi bois O‘zbekiston sheriklarga umumiy xavfsizlik va farovonlik yo‘lidagi Samarqand birdamligi tashabbusini taqdim etadi.

Bu tashabbus maqsadi – umumiy kelajakka befarq bo‘lmagan, ixtiloflarga qaramasdan kelishilgan yondashuvlar va qarorlarni izlashga tayyor, "Samarqand ruhi" tamoyillariga hamfikr bo‘lganlar barchasini global sivilizatsiyalararo muloqotga jalb qilish.

Uning amaliy ijrosiga doir masalalarni siyosiy yetakchilar, jamoatchilik, ishbilarmonlar, akademik va ekspert doiralari nufuzli vakillari ishtirokida kelgusi yili Samarqand xalqaro forumida birgalikda ko‘rib chiqish taklif etildi.

Davlat rahbari so‘zi yakunida O‘zbekiston raisligidagi maqsadlarga erishishda faol ko‘mak uchun hamkasblariga minnatdorlik bildirdi.

“Ishonchim komilki, bugun qabul qilinayotgan hujjatlar va qarorlar mamlakatlarimiz va xalqlarimiz taraqqiyoti hamda farovonligi yo‘lida mintaqaviy va global xavfsizlikni ta’minlash maqsadida Shanhay hamkorlik tashkiloti yanada izchil rivojlanishiga hamda tashkilotimiz nufuzining yuksalishiga munosib hissa bo‘lib qo‘shiladi”, dedi prezident.